Janari-bilketako begirada eta aurpegiak

Zurbila, hotza, mesfidatia, zuhurra, fidagaitza, ernea, mina, bizia, adeitsua, kezkatia, uzkurra, argia, borondatetsua, lotsatia, hitsa, makurra...

Saltoki erraldoietan biltzen den jende anitzaren erradiografia egiteko, aski da edozein asteburutan sarrerako edozein besaulkitan jesarririk oren bat behaketan igarotzea, gure gizartean diren giza maila, behar, kolore, hizkuntza eta musajeez jabetzeko; ez dago zundaketa hoberik.

Azkeneko asteburuan Turkia eta Siria inguruetan izandako lurrikararen ondorioak jasandakoez herritar arruntak egin ditzakeen ekimen bakarretakoa izan da janari arrunta eskaintzea, iritsiko zaien bermea duten elkarte edo gobernuz kanpoko erakunderen baten bidez; horixe litzateke hurbileko erantzuna-edo dei daitekeena, Zaporeak elkarteak antolatu duena tarteko.

Dilista, makarroi, esne, arrain-kontserba, arroz eta abarren anoa bakar bat besterik ez erosi eta ematen duenaren borondatearen neurria non datza?

Bestetik da politika handia: NBEk, estatuek, nazioek, erakundeek, elkarteek, bakoitzak bere ahalaren arabera egin edo egin dezakeena. Horrelakoetan, bihotza ez da aski; borondateaz gain, aurreikuspena, antolaketa eta erabakiak behar dira.

Emaile ilaran egungo euskal gizartearen kultur-anitza islatuta ikus daiteke, bakoitzak bere jatorria, kultura, hizkuntza, bizi-nahia eta ezina, hau da, larre motxekoa luzez izanik eta bi-hiru urte hala moduzko ibilera lazgarrian hona iritsi eta, asteburu honetan harako janari-eske dagoenaren aitzinean zer egin bat-batean pentsatu gabe zirt edo zart egin behar duenaren jarrerak zirrara sorrarazten du.

Nola erantzun behar dio boluntarioak?

Adibide bat edo beste. Turkia hitza entzun hutsarekin barne-sua asaldatzen zaionari zer esan? Armenian Turkiak eginiko sarraskiaren berririk dugun galdetzen digu batek: herra dario begirada hotz eta ausartaren gibeletik. Arrazoi osoz Turkiarako ez duela ezertxo ere emango erran digu. Nahiz eta herritarrak eta gobernua nahastu behar ez diren, beharrak ez du ideologiarik, baina memoria historikoa ere gogoratzekoa da.

Betalde, Siriaren egoera nahasia eta latza aurreikusita, bertarako laguntza eskatu bai baina iritsiko ez den susmoak ere zenbaiti muzin eragiten dio kilo-arroza aise eman lezakeenean.

Giza mixeriaren inguruko hausnarketa ez da inoiz amaituko, zoritxarrez, baina hemengo nahiz edonongo beharrak hortxe dirau.