Iragan larunbatean, partida jokatu zuten Girondins eta ACB taldeek, Baionako Jean Dauger futbol zelaian. Norgehiagoka ikustera joandako zenbait emakumek, ordea, «ukituak» eta «miaketa bidegabeak» egin zizkietela salatu dute.
Girondins taldeko zenbait jarraitzaileren arabera, estadioaren inguruko segurtasunaz arduratzen zirenek «jokabide onartezina» izan zuten egun hartan: «Umiliagarria eta iraingarria izan zen. Onartezina da estadioan sartu aurretik jarraitzaileen osotasun fisikoa eta intimitatea bortxatzea», salatu dute sare sozialetan zabaldutako ohar batean. Zehazki, miaketak «gorputz atal intimoetan» egitea egotzi diete hala segurtasun pribatuari nola Poliziari. Biktimetako batzuk adingabeak direla ere esan dute.
Girondins taldeko jarraitzaileek adierazi dute «oso serio» hartu dituztela gehiegikeria horiek, eta ez dituztela «pasatzen utziko». Hori dela eta, helbide elektroniko bat sortu dute, ukitu eta miaketa desegokien biktima izan direnek gertatutakoa salatu dezaten: justice.ub87@gmail.com. Iragarri dute «ekintza bateratu bat» eginen dutela, behin salaketa guztiak bilduta. «Biktimen ondoan gaude, eta babes osoa emanen diegu».
