Munduko Tranpolin Txapelketa jokatzen ari dira Iruñean, Nafarroa Arena pabiloian. Hainbat herrialdetako kirolariak ari dira parte hartzen txapelketa horretan, eta horien artean, Israelgoak. Hain zuzen, Israelgo kirolari horiek parte hartzearen aurkako protesta egin zuen atzo Nafarroako BDS Boikota, Desinbertsioa eta Zigorrak elkarteak.
Plataforma horrek kontzentrazioa egin zuen Nafarroa Arena pabiloiaren aurrean, Israel munduko kiroletik kanpora. Nafarroako Gobernua konplize lelopean. Hainbat lagun bildu ziren pankarta horren atzean. Foruzaingoak izan zituzten aurrean, protestan ari zirenak Nafarroa Arenara gerturatu ez zitezen.
BDZ Nafarroaren iritziz, Israelgo kirolariak nazioarteko lehiaketa batean parte hartzea ez da «kirol ekintza neutral bat», baizik eta «Israelen estrategia bat erregimen kolonial bat, apartheid erregimen bat normalizatzeko, zeina herri palestinarra zapaltzen ari den duela zazpi hamarkada luzetik».
Ez zen egon Nafarroako Gobernuko ordezkaririk Nafarroa Arenan, baina BDSk salatu zuen Israelgo kirolariei parte hartzen utzita Nafarroako Gobernuak ez dituela bete nazioarteko sententziak. Israelekin «harreman oro» eteteko eskatu zion Nafarroa Gobernuari: «Politikoak, ekonomikoak, kulturalak eta kirol arlokoak».
