Gaur goizean Espainia erdialdian, Urdan (Gaztela-Mantxan), izandako tren istripu larriaren ondorioz, Espainiako Futbol Federazioak bertan behera utzi ditu gaur jokatzekoak ziren Kopako partidak. Tartean dira euskal taldeak jokatzekoak zirenak, hauek: Anaitasuna-Alaves, Peña Sport-Huesca, Pamplona-Eibar, Portugalete-Real Union, Amorebieta-Logroñes, eta Reus-Barakaldo.
Federazioak «doluminak eta babesa» azaldu die hildakoen senide eta gertukoei, eta iragarri du datozen egunetan jakinaraziko duela neurketa horiek noiz jokatuko diren.
Bestalde, Athleticek eta Osasunak bihar jokatuko dute Kopako lehen kanporaketa. Etxetik kanpo ariko dira biak. Gorritxoek Calatayud izango dute aurkari (19:00), eta zuri-gorriek AE Prat (21:00). Oraingoz, Federazioak ez du ezer esan partida horien inguruan, beraz, printzipioz, bihar jokatuko dira.
Horrez gain, Realak Europa kopako final-zortzirenetako joaneko partida jokatuko du gaur, Turkiako Fenerbahce taldearen kontra. Txuri-urdinek Zubietan jokatuko dute (19:00, ETB1). Txapelketa hori UEFAk antolatutakoa da, eta ez dute atzeratu.
