Donostia eta Bilbo hautagaiak dira 2030eko Munduko Futbol Koparen egoitza izateko, eta aferak zenbait kezka, zalantza eta eztabaida sortu ditu. Bada, Juan Mari Aburto Bilboko alkateak adierazi duenez, lanean jarraitzen dute Bizkaiko hiriburua egoitzetako bat izan dadin. Hiriarentzat «garrantzitsua» izan daitekeela uste du. Horrez gain, Bilbo Munduko Errugbi Koparen egoitza izatea ere nahi dute: gizonezkoena 2035ean, eta emakumezkoena 2037an.
Haren hitzetan, FIFA Bilbora etortzeko «irrikaz» dago. «Guztiek babesten dituzten azpiegiturak ditu Bilbok, nahiz eta hasieran batzuek ez zuten eraiki nahi San Mames berria. Erabaki horri esker, lan egin dezakegu Munduko Kopa Bilbon hartzeko aukeraren inguruan».
Munduko Errugbi Koparen egoitza izateko lanean ere ari dira, Aburtok esan duenez. Hori ere hiriarentzat «garrantzitsua» izan daitekeela uste du: «Asko falta da, baina aurrez landu behar dira halako kontuak».
Ekainean prentsa ohar bateratua atera zuten Eusko Jaurlaritzak, Bilboko eta Donostiako udalek, Bizkaiko eta Gipuzkoako foru aldundiek eta Athleticek eta Realak, eta jakinarazi zuten Bilbok eta Donostiak 2030eko Munduko Futbol Koparako hautagaitza bateratua aurkeztuko dutela, eta FIFAri galdegingo diotela partidak San Mamesen eta Anoetan joka ditzaten.
