Eusko Label ligako traineruek soilik izango dute estropada gaur eta bihar: gaur Bueun, eta bihar Aresen (Galizia). Cabokoek, beraz, ez dute bidaia luzerik egin beharko asteon, denboraldian bigarren aldiz. Baina salbuespena da, orain arte 10.300 kilometro egin baitituzte ligako estropadak jokatzeko. Distantzia hori bera dago Bilbotik Pekinera.
Ez da ahuntzaren gauerdiko eztula astean 700-800 kilometro egitea estropada eremuraino eta beste hainbeste etxera itzultzeko. Cabokoek ondo baino hobeto dakite. Talde horretako arraunlaria da Juan Gonzalez, eta, kontatu duenez, bidaian hainbeste denbora eman behar izateak eragina du familiako eta laneko antolaketan, besteak beste. «Kontxako Bandera jokatuko den honetan, lanean ari garenok aste osoa eskatu behar dugu jai».
Denboraldiak iraun bitartean, «ahal bezala» moldatzen dira, baina onartu du zaila dela: «Hiru furgonetatan ateratzen gara, bakoitza ordu batean; azkeneko furgonetakoak arratsaldeko zazpietan abiatzen da, eta Asturiasen egiten dute lo, biharamunean iristeko». Gonzalezek adierazi du asteburuak familiarekin egoteko tartea izan behar lukeela, baina senideak ez dituztela ikusten ia: «Hori nekagarri samarra da, baina badakigu TKEn arraun egiteko zeri aurre egin behar diogun».
«Badakigu zaila dela salbatzea, hau da, kanporaketa estropada jokatzea, baina ez dugu ezer galdutzat joko»
JUAN GONZALEZ Cabo taldeko arraunlaria
Azken asteburuan lehian aritzeko gogoz direla kontatu du, sailkapenean azkenak diren arren: «Badakigu zaila dela salbatzea, hau da, kanporaketa estropada jokatzea, baina ez dugu ezer galdutzat joko».
Iago Davila entrenatzaileak denboraldi hasieran esan zuen taldearen %85-90 oso gaztea eta taldean hasi berria zela, eta Gonzalezek berretsi egin du hori: «Hain zuzen, Bilboko lehen estropada hartan debutatu zuten askok TKEn». Hiruzpalau arraunlari ziren soilik aurrez Eusko Label ligan ibilitakoak: Davila bera, Cosme Sampedro, Mario Brion eta Mario Fajardo. Gonzalezek iaz debutatu zuen, baina ez zituen estropada guztiak jokatu.
«Aldaketa asko izan ditugu kolpean, jende berri asko». Azaldu du hobe litzatekeela gutxinaka sartzea jende berria, baina horrela tokatu dela: «Ez genuen espero denboraldia horren zaila izatea: espero genuen lehen txandan egotea, baina ez horren atzean». Denboraldiak aurrera egin ahala barneratuz joan direla adierazi du, eta asmatu dutela ondo eramaten.
Haren hitzetan, taldeko giro onaren ondorio da ondo eraman izana: «Aurrekoan aritu ginen horretaz: urterik onena izan da taldea sendotzeari dagokionez». Borobildu egin du esana: «Talde gisa, lortu dugu emaitza txarrak ondo eramatea».
Mailari eutsi ezean, Galiziako traineruen ligan arituko lirateke. «Liga horretan aritzekotan, emaitzek asko baldintzatuko dute taldeari eutsi ala ez; ahal duguna egingo dugu jende gutxik utz dezan».
11 urteko ibilbidea
Cabok 11 urte daramatza TKE ligan —Eusko Label izena du egun, baina San Miguel izena ere izan zuen tarte horretan—. 2003tik 2009ra ere aritu ziren, eta uko egin behar izan zioten baliabide ekonomiko nahikoa ez izateagatik. 2013an, Galiziako Traineruen Liga irabazi zuten, eta TKEra itzuli ziren. 2014. urtean, laugarren izan ziren sailkapen nagusian, eta, urtebete geroago, bigarren egin zuten etxeko estropadan. Hurrengo urteetan beti egon dira bigarren txandan sartzear.
Gonzalezek hamabi urte daramatza arraunean. Burura datorkion lehen estropada da Cabokoek 2014an etxean jokatu zutena: «Uste dut hirugarren egin zutela egun hartan, eta eguraldi oso txarra zegoen; gogoan dut nire entrenatzaileak aritu zirela arraunean eta izugarrizko giroa zegoela».
Cabo da TKE ligan estropada gehien jokatu duten taldeetan bosgarrena. «Lorpen handia da —eta harro egoteko modukoa— 11 urtez maila honetan eutsi izana, hainbeste kilometro eginda ere». Dena dela, badaki aurtengoa jokatzeko daukatela oraindik: «Urte horiek guztiek ez dute balio aurtengoa salbatzeko».
