Altuna III.ak eta Ezkurdiak atzo lortutako garaipenaren ondorioz, dena erabakita dago Binakako Txapelketako lehen fasean. Gaur, jada laugarren postua eskuratzeko aukerarik gabe, Jakak eta Iztuetak Elordirekin eta Zabaletarekin neurtu dituzte indarrak Altsasun (Nafarroa).
Inork ez zuen partida luzatzerik nahi, eta 39 minutu eskasetan amaitu dituzte lanak ―13-22 irabazi dute Elordik eta Zabaletak―. Jakak eta Iztuetak, ostiralean, Zornotzan, Larrazabalen eta Mariezkurrenaren aurka jokatuko dute kanporaketako neurketa; galtzen duena kalean geratuko da.
Aurrez, ostegunean, Altunak eta Ezkurdiak Zabalaren eta Martijaren kontra jokatuko dute Tolosan. Irabazlea zuzenean sailkatuko da finalaurrekoetarako, eta galtzaileak igandean beste aukera bat izango du beste kanporaketako garailearen kontra.
Elordik eta Zabaletak, berriz, Lasok eta Albisuk bezala, bi aste dituzte atseden hartzeko. Lehen postuan amaitu duen bikoteak bihar, Tolosan, lehen faseko azken neurketa izango du Peio Etxeberriaren eta Rezustaren aurka.
