Atzoko arantza kendu du Tolosaldeak. Ondarroan (Bizkaia) 44 ehunenengatik geratu zen banderarik gabe, eta gaur, azken aukeran, eskuratu du denboraldiko bigarren garaipena. Getarian (Gipuzkoa) jokatu dute Euskotren Ligako azken jardunaldia, eta, besteak beste, baieztatu da Hondarribia ETE ligara jaitsiko dela. Arraun Lagunak-ek atzo irabazi zuen liga, matematikoki, laugarren aldiz.
Atzokoagatik amorratuta irten da gaur Tolosaldea. Ziabogara arte ia parean ibili dira denboraldiko hiru ontzirik indartsuenak, Arraun Lagunak, Tolosaldea eta Orio, baina urdinak, itzulerakoan aurrea hartu, eta hurrengoari bi segundoren aldea aterata helmugaratu dira. Sekulako amorruarekin ospatu dute; denbora zeramaten sasoiko bigarren bandera lortu nahian, eta, kostata, baina irabazi dute. Ez hori bakarrik: gaurko emaitzari esker, ligako bigarren postua ziurtatu dute, eta baieztatu dute sasoi bikainean iritsiko direla Kontxako Banderara.
Arraun Lagunak-ek aise kontrolatu du denboraldia: hamabi bandera astindu ditu, eta hamabost punturen aldearekin irabazi du liga. Donostiako estropadari begira, ordea, irekita dago lehia, eta horixe geratu da agerian gaur.
Hondarribia, behera
Txanponaren beste aldea Hondarribiarena da. Gaur, azken jardunaldian, oraindik aukerak zituen mailari eusteko, baina Donostiarraren atzetik sailkatu da, eta, beraz, baieztatu da datorren urtean ETE ligan arituko dela. Nabarmentzekoa da, dena den, Miren Garmendia Hondarribikoen patroiak irabazi duela denboraldiko patroirik onenaren saria. Donostiarrak kanporaketa jokatu beharko du.
Horrela geratu da aurtengo denboraldiko sailkapena Euskotren Ligan: Arraun Lagunak izan da txapeldun, 120 puntu bilduta; Tolosaldea bigarren, 105 eskuratuta; Orio hirugarren, Tolosaldeak bezainbeste puntu irabazita; Zumaia laugarren, 68 punturekin; Astillero bosgarren, 50ekin; Hibaika seigarren, 49rekin; Donostiarra kanporaketarako postuetan, 42rekin, eta Hondarribia azkena, 37rekin.
