Euskal selekzioak beste bi domina irabaz ditzake gaur Munduko Euskal Pilota Txapelketan. Trinket egokituan, finala jokatuko du Frantziaren aurka, Euskal Herriko 22:00etan, Club Ciudad de Buenos Airesko trinketean. Ligaxkan ere elkarren aurka jokatu zuten, eta Frantziak irabazi zuen: 2-0 (15-7 eta 15-9). Beñat Lizaso eta German Luis Elkoro aritu ziren egun horretan, baina baliteke Sergio Rodriguezek edo Edorta Antak jokatzea. Euskal selekzioak arrastoa uzteko aukera du, lehen aldiz ari baitira jokatzen pilota egokituan Munduko Txapelketan.
Gaur beste domina bat irabazteko aukera ere badu euskal selekzioak, xarean hirugarren eta laugarren posturako partida jokatuko baitu, 17:00etan, Argentinaren aurka. Euskal selekzioak balentria egin zuen ligaxkako azken jardunaldian: 2-0 irabazi behar zion Uruguairi, eta horixe egin zuten Oier Iturbek eta Markel Mujikak. Xuban Lopetegi da euskal selekzioko beste xarelaria. Ikusteko dago zein bi pilotarik jokatuko duten.
Alberdi eta Martin, finalera
Euskal selekzioak bi domina lortu ditu jada: urrezkoa eta zilarrezkoa 54 metroko frontoiko binakako zesta-puntan. Gaur, berriz, bat irabaziko du ziur, eta baliteke beste bat ere eskuratzea. Beste zazpi ziurrak ditu, beste horrenbeste final jokatuko baititu. Hau da, hamar domina irabaziko ditu, gutxienez. Atzo, gizonezkoen frontball-eko finalerako sailkatu zen, Julen Alberdik irabazi egin baitzion Espainiako ordezkari Santi Yaniz nafarrari finalerdietan: 2-1 (10-8, 4-10 eta 5-2). Finalean, Alberdi Mexikoko ordezkariaren aurka ariko da, larunbatean, 17:00etan. 30 metroko frontoiko paleta gomazkoan ere finalerako sailkatu zen atzo euskal selekzioa, Nagore Martinek irabazi egin baitzion Dulce Miranda mexikarrari: 2-0 (15-10 eta 15-6). Finalean, Espainiaren aurka ariko da, eta ezusterik ezean, Maider Ardanaz nafarraren kontra, ostiralean, 23:00etan.
36 metroko frontoian, berriz, bost final jokatuko ditu euskal selekzioak: eskuz banaka eta binaka, Espainiaren aurka jokatuko du; emakumezkoen banakako zesta-puntan, Espainia izango du aurkari, eta gizonezkoetan, Frantzia. Pilota egokituan, berriz, Frantziaren aurka ariko da. Esku huskako eta zesta-puntako finalak ostiralean jokatuko ditu, 17:00etatik aurrera; eta, 36 metroko pilota egokitukoa, larunbatean, 19:00etan.
Final horiez gain, euskal selekzioak brontzea irabazteko partida jokatuko du emakumezkoen frontball-ean, larunbatean, 15:00etan. Gaur, Miren Larrartek galdu egin du finalerdietan Paola Reyes Mexikoko ordezkariaren aurka: 2-0 (10-8 eta 10-5). Pala motzean, berriz, euskal selekzioak finalerdia jokatuko du gaur, AEBen aurka, 19:00etan. Frantzia eta Espainia ariko dira beste finalerdian.
Euskal selekzioa bikain ari da, eta horren erakusle, bi modalitatetan baino ez da geratu domina bat irabazteko aukerarik gabe: gizonezkoen 30 metroko frontoiko paleta gomazkoan eta 36 metroko frontoiko paleta larruzkoan.
