Duela hilabete pasatxo hagitz zaila edo ia ezinezkoa ematen zuena, lortu egin du Euskaltel-Euskadik: UCI Nazioarteko Txirrindularitza Batasunaren sailkapenean lehenbiziko 30 taldeen artean bukatu du denboraldia. Horrenbertzez, aukera izanen du heldu den urtean hiru itzuli handietan lehiatzeko, antolatzaileek gonbidatzen badute —30. postutik gibelera gelditu diren taldeek ezin dute gonbidapenik jaso—.
Gaur bukatuko da errepideko gizonezkoen denboraldia. Panamako Chiriqui probintziako klasikoan parte hartzen ari da Euskaltel, baina ez du han bilduko dituen puntuen esperoan gelditzeko beharrik, gaur lehiatu diren Nazioen Erlojupekoak, Veneto Klasikoak eta Serbiako Itzuliko azken etapak erabaki baitute azken sailkapena. Euskaltelek Picnic, MBH eta Bardiani taldeekin izan du lehenbiziko 30etan sartzeko lehia, eta, azken buruan, Italiako Bardiani gelditu da kanpoan.
Euskaltelek Nazioen Erlojupekoan eta Veneto Klasikoan hartu du parte. Nazioen Erlojupekoan hiru txirrindulari atera ditu: Txomin Juaristi, eta Axel eta Danny van der Tuuk anaiak. Juaristik 11. bukatu du bakarkako erlojupekoa, Axel van der Tuukek hamahirugarren eta Dannyk hemeretzigarren. Arerioen artean, MBHk hartu du parte proban, bertze hiru txirrindularirekin, baina talde laranjakoek baino puntu gutxiago bildu ditu —23 Euskaltelek, eta bederatzi MBHk—.
Bardianik ez du Nazioen Erlojupekoan parte hartu. Veneton eta Serbian puntu anitz lortzeko betebeharra zuen, baina desabantaila handiegiarekin hasi du eguna. Serbiako Itzuliko azken etapa irabazi du Filippo Magli txirrindulariarekin, eta sailkapen nagusian ere lortu ditu puntu batzuk, baina, denera, Euskaltelek Nazioen Erlojupekoan lortu dituenak baino gutxiago. Veneto Klasikoan, berriz, anitzez puntu gehiago zeuden jokoan —sailkapeneko lehen berrogeiek jaso dituzte—, baina parte hartzea goi-mailakoa zenez, hagitz garestiak izan dira. Bardianik hamar pilatu ditu, eta, Euskaltelek, hiru —Iker Mintegik, 36. sailkatuta—.
Panamako Chiriqui probintziako klasikoa Gotzon Martinek irabazi du, bigarren eta azken etapan bigarren egin ondotik. UCIk sailkapen ofiziala emateko faltan, Euskaltel 28. litzateke, 2.912 punturekin. 31.a, Bardiani, 218 puntura utzi du.
Mikel Bizkarraren agurra
Euskaltelen txirrindulari garrantzitsuenetako batek gaur korritu du azken lasterketa. Mikel Bizkarrak Veneto Klasikoan utzi du txirrindularitza —ez du bukatzerik izan—. Mañariarrak 37 urte ditu, eta hamabortz egin ditu profesionaletan. Euskadi Fundazioan aritu ondoren, 2015ean Murias Taldeak fitxatu zuen, eta 2019ra arte lehiatu zen egitura horretan. Tarte horretan, 2018an, hamazazpigarren bukatu zuen Espainiako Vueltan. Euskadi-Murias taldea desagertu ondotik, Euskaltel-Euskadik fitxatu zuen, 2020an, eta talde laranjaren liderretako bat izan da erretiroa hartu duen arte.
Bi munduko txapeldunak irabazle
Gainerakoan, egunak utzi du ohikoa ez den irudi bat: bi txirrindularik irabazi dute munduko txapeldunaren ortzadar maillota soinean zutela. Frantzian, Remco Evenepoelek, bakarkako erlojupekoko munduko txapeldunak, irabazi du Nazioen Erlojupekoa. Italian, berriz, Brandon McNulty, iraupen luzeko proban munduko txapeldun dena, garaile izan da Veneto Klasikoan. Biek joan den hilean irabazi zituzten Munduko Txapelketako probak Montrealen (Quebec).
