Milimetroengatik, Remco Evenepoel da Europako txapeldun berria. Flandriarra lehen postuan helmugaratu da Sencurren (Eslovenia) amaitu den lasterketan, baina lehia amaitu berritan berak ere ez zuen argi Giulio Cicconeri (Italia) aurrea hartu zion edo ez. Azkenean, foto finishak argitu du garailea, eta besoak amorruz altxatu ditu Evenepoelek.
Munduko txapelketan ere faboritoa zen, baina han ez zen fin ibili, eta gaur baieztatu du egun txar bat besterik ez zela izan hura, astebete geroago hasi eta buka kontrolpean izan baitu Europako txapelketa. Eta hori, 36 kilometroren faltan eroriko bat ere izan duela; itxura ederra zuen erasoa jo du, baina erorikoak berriz ere lan egitera behartu du.
Eguneko ihesaldiak ez du ibilbide luzea egin, hein batean, Belgikak lan bikaina egin duelako. Bost buelta eman dizkiote amaierako zirkuituari, eta faboritoen mugimenduak azken aurreko itzulian hasi dira. Roglic mugitu da lehendabizi, baina eraso serioa Evenepoelena izan da. Cicconek bakarrik eutsi dio, baina ihesaldia ekin eta berehala erori da flandriarra.
Zutik jarri eta segituan harrapatu du berriz ere Ciccone, biek batera tartea irekitzeko. Hala, esprintean erabaki da titulua: Ciccone bikain atera da azken bihurgunetik, metro batzuetako errenta hartu du, baina luze egin zaio esprinta, eta, atzetik aurrerakoa eginda, larri larri, aurrea hartzea lortu du Evenepoelek. Zirraragarria izan da amaiera.
Christian Scaronik (Italia) jantzi du brontzezko domina, eta 25. amaitu du Urko Berrade nafarrak.
