XXI. mendean jaio zen Sara Ortega Athleticeko jokalaria (Logroño, Espainia, 2005). Duela urte batzuk, klub zuri-gorriaren etorkizuna marraztu zezaketen harribitxietako bat zen. Orain, aldiz, dagoeneko oraina marrazten ari da, mende honetan jaio diren beste zenbait jokalarirekin batera: Ogiza, Nevado —kapitainak biak—, Elexpuru, Pinedo, Zubieta… Joan den denboraldian Txapeldunen Liga jokatzeko atarian geratu ziren. Laugarren egin zuten. Azken hitza ez dute esan oraindik, ordea. Logroñoko aurrelaria anbiziotsua da. Joan den denboraldikoa «hobetu edo berdindu» nahi du. Hori lortzeko lehen pausoa gaur eman behar dute zuri-gorriek. Teneriferen aurka jokatuko dute, Lezaman (12:00, DAZN). Javi Lergaren estreinakoa izango da Athleticen aulkian. Ortega prest da jokatzeko, denboraldiaurrean giharretako arazoak izan dituen arren.
Txapeldunen Ligaren atarian geratu zineten joan den denboraldian, laugarren izan baitzineten. Zer moduz ikusten duzu taldea?
Taldea oso ondo aritu da denboraldiaurrean. Gogotsu gaude ligari ekiteko. Pixkanaka joango gara, larunbatean [gaur] hasi eta etxean hiru puntuak lortuta. Oxala joan den denboraldian egin genuena egingo bagenu oraingoan ere.
Athleticen belaunaldi berri honentzat aurrerapauso handia izango zen Espainiako Ligan laugarren geratzea sailkapenean.
Bai, talde gaztea gara, baina asko hobetu dezakegu. Uste dut joan den denboraldia oso ona izan zela, eta aurrekoa ere bai. Hala ere, gehiago nahi dugu, eta atzetik datozen gazteak ahalik goren iritsi nahi dute. Oxala titulu bat irabaziko bagenu, edo sailkapenean gorago amaitu.
Espainiako Kopan, ordea, kolpe latza hartu zenuten, final-zortzirenetan galdu egin baitzenuten, Cacereñoren aurka.
Joan den denboraldian ezusteko ederra hartu genuen Kopan. Uste dut taldeak partida horretan emandakoa baino askoz ere gehiago eman dezakeela. Denboraldi honetan espero dugu gutxienez finalerdietara ailegatzea. Ea finalera ailega gaitezkeen. Athleticek Kopa sutsuki bizi izaten baitu, bai gizonezkoetan, baita emakumezkoetan ere.
David Aznarren ordez, Javi Lerga etorri da. Aurrez ezagutzen zenuen Espainiako selekzioko azpiko mailetako hautatzaile moduan?
Justu ni ez naiz entrenatu harekin, baina, adibidez, Daniela Agote eta beste taldekideren batekin entrenatu da. Oso ondo hitz egin digute hari buruz. Oraingoz, oso pozik nago helarazten ari den jokatzeko moduarekin, baita entrenatzaile aldaketarekin berarekin ere.
Nola jokatuko duzue?
Aznarrekin genuen estiloarekin alderatuta, nahiko antzeko jokatuko dugu. Baloia izaten saiatuko gara, azken bi denboraldietan Davidekin egin dugun bezala. Lergak ere hori nahi du. Baloiarekin ausartak eta anbiziotsuak izatea. Oso pozik nago, jokatzeko modu hori asko gustatzen zait eta.
«Aznarrekin genuen estiloarekin alderatuta, nahiko antzeko jokatuko dugu. Baloia izaten saiatuko gara»
Joan den denboraldian alboko atzelari gisara jokatu zenuen zenbait partidatan, baita zelai erditik aurrerako hainbat postutan ere. Non uste duzu egiten diozula ekarpenik handiena taldeari?
Euskarriaren aurretik edo erdi-puntan jokatzea gustatzen zait gehien. Hala ere, zortea dut, hainbat postutan jokatzeko gai bainaiz, eta uste dut hori ere nire onerako dela. Nagoen postuan nagoela, saiatzen naiz taldeari ahalik eta ekarpenik handiena egiten. Taldeari lagundu nahi diot, eta asteburuero hiru puntuak lortzen saiatu, jokatzen dudan postuan jokatzen dudala.
Joan den denboraldian zazpi jokalarik 2.000 minututik gora jokatu zenuten. Zuk 25 partida jokatu zenituen hasieratik. Bi gol sartu eta hiru gol pase egin zenituen. Azken alor horretan hobetu nahiko zenuke?
Denboraldi honetarako helburuetako bat hori da. Anbiziotsuagoa izatea golak sartzeko eta gol paseak emateko orduan. Baina arreta handiagoa jartzen dut taldeari jokoan laguntzean. Egia da joan den denboraldian zortea izan nuela, Lehen Mailan egonkortzeko aukera izan bainuen. Asko jokatu nuen. Horrez gain, uste dut David Aznarrek konfiantza izan zuela niregan, eta ahalik eta gehien aprobetxatu nuen. Oso pozik nago, eta oxala denboraldi honetan iaz bezainbeste edo gehiago jokatuko banu.
Ane Campos aurrelaria eta Olatz Santana atezaina fitxatu ditu klubak denboraldi honetarako. Nola ari dira?
Bi jokalari garrantzitsu dira, eta uste dut ekarpen handia egingo diotela taldeari. Aurretik ezagutzen genituen. Eibarren eta Realaren aurka jokatu izan dugunean, aurrez aurre aritu gara.
Ainize Barea ‘Peke’ ere itzuli da, amatasun baimenaren ondotik.
Bai, Peke beti egon da gurekin, nahiz eta orain geldirik egon haurdun geratu zelako. Ondo ikusten dut, eta oso pozik dago. Ekarpen handia egiten dio taldeari bai zelai barruan, baita hartatik kanpo ere.
Denboraldiaurrean denetariko emaitzak izan dituzue. Min hartuta egon zarenez, kanpotik nola ikusi dituzu taldekideak?
Sasoiaurrean ezin izan ditut lagunartekoak jokatu, giharretako arazoak zirela eta. Taldea nahiko ondo aritu da. Martxa hartzen ari gara. Azken batean, hori da garrantzitsuena denboraldiaurrean: erritmoa hartzea, gauza berriak probatzea, eta geure burua ondo nabaritzea ligari begira. Orain, garrantzitsuena da asteburu honetan hiru puntuak lortzea. Gainera, hurrengo asteburuan partida garrantzitsua dugu San Mamesen, Bartzelonaren aurka.
Zein da denboraldiko helburu nagusia?
Oraindik ez gara hasi ere egin, baina egia da taldea gogotsu dagoela sasoiari ekiteko, eta joan denboraldian egin genuena berriro egiteko. Presidenteak prentsaurreko bat egingo du helburuez zehatzago hitz egiteko, baina guk pixkanaka jardun nahi dugu. Joan den denboraldian lortutakoa hobetu edo berdindu nahi dugu.
Gaur Teneriferen aurka jokatuko duzue. Zer itxura hartzen diozu partidari?
Tenerifek denboraldi asko daramatza gorenean. Eskarmentu handiko jokalariak ditu, urte luzez gorenean jokatzen aritutakoak. Uste dut partida estua izango dela. Gainera, ligako lehen partida da, eta bi taldeak gogotsu irtengo gara zelaira. Partida polita izango da ikusteko eta jokatzeko.
Hamaikakoan ikusten duzu zeure burua?
Oxala [barrez].
