Erreginaren Kopa irabazi ostean, Bera Berak ezin izan du ligako tituluarekin biribildu sasoia. Asteazkenean, Donostiako taldeak Ro'Casaren aurkako finaleko lehen partida galdu zuen, Gaskan, eta gaur, bigarrena, Telden (Espainia). Ondorioz, Kanaria Handiko taldeak altxatu du garaikurra.
Bera Bera zen faborito finalean, baina lehen partidan Silvia Navarro Ro'Casako atezain beteranoarekin topo egin zuen Imanol Alvarezen taldeak, eta gaur, berriz, Kanarietako taldearen beste atezainarekin, Lulu Guerrarekin. Neurketa bikaina jokatu du atezainak, eta hein batean orri esker, une oro partidan izan da etxeko taldea.
Hasieran, Ro'Casak ondo baliatu ditu Bera Berak atezainik gabe jokatu dituen minutuak: baloiak berreskuratu ditu, gol azkarrak egin ditu, eta markagailuan tartetxoa ireki du. Alvarezen neskek, ordea, jokoan zer zegoen jakitun, markagailua irauli dute, eta atsedenaldira aurretik heldu dira (8-10).
Abantaila hori, ordea, bigarren zatia hasi bezain pronto galdu dute (12-10). Elba Alvarezek sartutako pare bat penaltiri esker, berriz ere hartu dute aurrea Donostiakoek (13-14), baina ordurako haizea etxekoen alde zegoen. Bera Berak borroka egin du amaierara arte, baina alferrik izan da (26-23). Alvarezen taldeak gaizki ohitu ditu zaleak, baina beti ezin da irabazi.
