Hiru hilabete baizik ez du iraun Alavesen eta Jose Luis Mendilibarren arteko harremanak. Gasteizko klubak iragarri duenez, taldearen eta teknikariaren arteko kontratua etetea erabaki dute bi aldeek. 2021eko abenduaren hondarrean hasi zen Mendilibar Gasteizkoen entrenatzaile lanetan. Orduko hartan azaldu zutenez, argia zen Zaldibarkoari esleitutako helburua: taldearen egoera irauli eta mailari eustea. Ordea, ez da izan suspertzerik: taldea jaitsiera postuetan sartua da gaur egun. Klubak aitortu duenez, emaitzak «ez dira esperotakoak»; horregatik erabaki dute Mendibilarri agur esatea.
Tenikari bizkaitarrak kargua hartu zuenetik, hamabi partida jokatuta, garaipen bakarra lortu du Alavesek. Lau aldiz berdindu du markagailuan, eta zazpi porrot pilatu. Golei dagokienez, bederatzi baizik ez dituzte sartu Gasteizkoek, eta, berriz, 23 jaso dituzte kontra. Sailkapenean hondoratua da taldea: sei puntu behar ditu jaitsiera postuetatik ateratzeko.
Klubak azaldu duenez, «beti da zaila» entrenatzaile baten kontratua etetea. Ordea, oharrean zehaztu dute «sinetsiak» direla badela egoera iraultzeko aukerarik. Edonola ere, klubak oraindik ez du iragarri zeinek beteko duen Mendilibarrek utzitako hutsunea –denboraldi bakarrean aritutako bigarren entrenatzailea izan da Mendilibar, Javier Callejaren lekukoa hartu baitzuen–. Azken sei urteetan, 11 teknikari izan dira Alavesen lemazain. Ikusteko dago zein izanen den hamabigarrena.
