Euskal selekzioak eta Palestinakoak lagunarteko partida bat jokatuko dute azaroaren 15ean, San Mamesen, 20:30etik aurrera. Neurketak ikusmin handia piztu du, eta Bilboko estadioa lepo betetzea espero da. Euskadiko Futbol Federazioak jakinarazi duenez, ostegunean jarriko dituzte salgai neurketa hori ikusteko sarrerak. Hain zuzen, goizeko hamarretatik aurrera erosi ahalko dira, Euskadiko Futbol Federazioaren webgunean: www.euskadifutbol.eus. Sarrera bakoitza eserleku jakin baterako izango da, eta prezioa 20,5 eta 31,5 euro artekoa izango da. Irabazi guztiak Palestinaren alde aritzen diren erakundeentzat izango dira.
Ez da neurketa soil bat izango. Halaxe esan zuen Jibril Rajub Palestinako Futbol Federazioko lehendakariak: «Oroimenaren gune sakratu honetan hartzen du futbolak bere esanahirik handiena. Hau ez da trebetasun erakustaldi hutsa, futbolaren botere moralaren erakusgarria baizik». Bada, keinu solidario gehiago ere izango dira: Gure Esku, Gu Ere Bai eta Gernika-Palestina Deialdi Herritarra plataformek elkartasun martxarako deia egin dute, Herri Libreak. Euskal Herria-Palestina. Genozidioa Stop lelopean.
Bilboko Arriaga plazatik abiatuko da martxa, 17:30ean, eta San Mameseko Zabaldegian amaituko da. Palestinari elkartasuna erakutsi nahi diote, eta baita «bi herriei dagozkien kirol eta nazio eskubideak aldarrikatu ere, selekzioen ofizialtasuna barne». Eragileei ekinaldiarekin bat egiteko deia egin diete.
