«Aurkariari baino gehiago, janzkera araudiari nion beldur», aitortu du txantxetan Paul Veltenek. Baionako xake maisu handia Munduko Kopan aritu berri da, Goan (India). Lehen aldiz lehiatu da euskal jokalari bat Munduko Kopan. Nazioarteko Xake Federazioaren arautegiak eta antolakuntzak zeresana eman dute. «Egoitza ezerezaren erdian zegoen, eta hotel ofizialak, berriz, jokatu behar genuen tokitik ordu erdira. Hori ikusita, Maxime Vachier-Lagravek [frantziar xake maisu handia] eta biok erabaki genuen gertuago apartamentu bat alokatzea», azaldu du. Baina lapurtarra ez zen bakarra izan. Ian Nepomniaxtxi errusiarra ere kexatu zen torneoko baldintzez: janaria, hotela, eta beste kontu batzuk. Kanporatu zutenean, zera esan zuen: «Alde egitean tristatzen ez zaren leku horietako bat da hau». Torneoaren egoitzari buruz ari zen.
Guztira 206 jokalari aritu dira Munduko Kopan, eta, sailkapena kontuan hartuta, 134. postuan zegoen Velten, 2.530 elo puntu bilduta. Lehen txandan, antzeko maila duen aurkari bat izan zuen parean: Vladislav Kovalev bielorrusiarra (2.557 elo). Veltek galdu egin zuen norgehiagokako lehen partida; beraz, derrigorrean irabazi beharra zuen bigarrenean. Baina berdindu egin zuen. «Bi partidetan oso posizio onak izan nituen, irabazteko modukoak, baina ez nuen lortu abantaila nuen posizio horiekin irabaztea». Baionako jokalariaren ustez, «partidak ebazteko energia falta» igarri zuen irekitzearen ostean.
Hala ere, alde ona ere ikusi nahi izan dio horri. «Nahiz eta galdu, nik izan dut jokoaren ekimena bi partidetan». Aitortu du bigarren txandara ez pasatzeak «aho zapore txarra» utzi ziola, eta, arrazoi jakin bat aipatu du. «Bigarren txandara pasatu izan banintz, Vincent Keymerren, hau da, munduko laugarrenaren kontra jokatuko nukeen, eta, emaitza edozein izanda ere, oso esperientzia ona izango zatekeen». Dioenez, ez du asmorik amore emateko. Are gehiago, «etsipena pizgarri» bilakatu zaiola azpimarratu du. «Etsipenak gehiago lan eginarazi dit. Beharrezkoa den guztia egingo dut 2027ko Munduko Koparako sailkatzeko. Irrika bizia dut berriro aritzeko».
Haize freskoa
Txapelketari dagokionez, Javokhir Sindarov uzbekistandarrak irabazi zuen. Sindarov hamaseigarren zegoen torneoaren hasierako sailkapenean: 2.721 elo puntu. 19 urte baino ez ditu, eta 25.a da munduko sailkapenean. Maisu handiaren titulua, bestalde, 13 urte bete baino apur lehenago lortu zuen: oso gutxi dira hori hain gazte egin dutenak. Gainera, oso emaitza onak lortu ditu bere adinekoen txapelketetan, baina nagusienetan ere ikusgarri aritu da: adibidez, bai 14 urtetan bai 16 urtetan, Uzbekistango Txapelketa irabazi zuen maila nagusian. 2022an, berriz, bere herrialdearekin txapeldun izan zen xakeko Olinpiar Jokoetan.
Oso jokalari onak eta ospetsuak aritu dira Munduko Kopan: Dommaraju Gukesh, Arjun Erigaisi, Rameshbabu Praggnanandhaa, Anish Giri, Wesley So, Danil Dubov, Richard Rapport, Levon Aronian eta Peter Leko, besteak beste. Baina horiek guztiek galdu egin dute elo puntu gutxiagoko jokalarien aurka. Adibide harrigarriena Gukesh munduko txapeldunarena izan zen: hirugarren txandan kanporatu zuten. «Espero izatekoa zen hori gertatzea. Bi partidetako norgehiagoketan, aldea ez da hain handia eta, gainera, elo puntuen arteko aldeak batzuetan ez dira oso errealak. Elitean daudenek eliteko torneoak jokatzen dituzte eta, nolabait, haien elo puntuazioa babestuta dago horrela», azaldu du Veltenek.
«Etsipenak gehiago lan eginarazi dit. Beharrezkoa den guztia egingo dut 2027ko Munduko Koparako sailkatzeko. Irrika bizia dut berriro aritzeko»
PAUL VELTEN Xakeko maisu handia
Sindarovek oso seguru jokatu zuen, arrisku gutxi hartuta. Final-laurdenetan erakutsi zuen zein duen irabazteko gakoa, berdinketa hausteko lehen partidan Jose Eduardo Martinez mexikarraren kontra galdu zuenean. «Haren odol hotza benetan azpimarratzekoa da, eta horren seinale da Martinezen kontra galdu ostean nola erreakzionatu zuen eta nola gainditu zuen norgehiagoka. Oso jokalari teknikoa da, batez ere finaletan, baina haren onena zera da, estresa nola kudeatzen duen: altzairuzko nerbioak ditu».
Finalerdia eta finalak tankera berean irabazi zituen Sindarovek: arriskatu gabe eta posizio sinpleak baliatuta baina hutsik egin gabe. Wei Yiren kontrako finalean oso posizio parekatuak izan zituen lehen bi partidetan. Berdinketa hausteko lehen partidan, berriz, ez zuen ikusi finalerako posizio on bat irabazten saiatzeko aukera bat. Baina, bigarrenean, presioa sortu zuen pixkanaka txinatarraren posizioaren kontra, eta, nahiz eta objektiboki posizioa berdinduta egon, huts eginarazi zion aurkariari. Horri esker, bere ibilbideko garaipenik handiena lortu zuen. Hura, Wei eta Danrey Esipenko errusiarra —hirugarren sailkatua— ariko dira Hautagaien Torneoan.
