Plekari elkartea aurkeztu dute gaur, Baionako Moderne trinketean. Elkarte horrek kudeatu nahi du Ipar Euskal Herriko trinket profesionala aurrerantzean, zeregin horretan Esku Pilota elkartea ordezkatuta. Esku Pilotak 2008tik gaur arte izan du berezkoen zirkuitu profesionala kudeatzeko ardura, Frantziako Pilota Federazioarekin egindako hitzarmen bati esker, hark baitu horren eskumena.
Patrick Orhategarai Plekariko arduradun nagusietako batek azaldu duenez, trinketlari ia guztiek egin dute haien alde: hain zuzen, 24tik hemeretzik sinatu dute enpresa berri horrekin. Aldiz, Luis Sanchezek, Eneko Maizek, Iker Espinalek, Peio Gixandutek eta Julen Mariluzek ez dute erabaki Esku Pilotarekin jarraitu edo Plekarirekin sinatu.
Plekariko arduradunen arabera, trinketean «gauzak beste molde batera egiteko beharra» dago. Azaldu duenez, trinketlariak «kexu» dira egungo sistemarekin, eta klubek «babes eta laguntza gehiago» izan nahi dute. Hala, «behar horiei erantzuteko asmoz» eman dute aurrerapausoa. Adierazi dutenez, «aktore guztiak» izan nahi dituzte elkartearen zuzendaritzan.
