Realak bost denboraldiz jarraian jokatu zuen Europan Imanol Alguacilen aro loriatsuan. Aurreko sasoian ez zuen hala egin. Baina Espainiako Kopa irabazi zuen, eta garaikurra irabazteak aukera eman dio berriz kontinente zaharrean barrena lehiatzeko: Europa ligan izango da. Txuri-urdinek bidea luzea egin nahi dute txapelketan, eta bidaia Franfurkten amaitu, Alemanian, datorren urteko maiatzaren 26an. Egun horretan jokatuko da txapelketaren finala. Horretarako, mugarriz mugarri joan behar dute. «Poliki-poliki», gaur Pellegrino Matarazzok partida aurreko agerraldian berriz esan duen moduan. «Baina geure buruari mugarik jarri gabe, gure taldeak anbizioa baitu». Hala, gaur jokatuko dute multzoen faseko lehen norgehiagoka, Anoetan, Bornemouth taldearen kontra (21:00, Movistar Plus).
Matarazzok gaur aipatu duen anbizioari lotuta, bai Jokin Aperribai presidenteak, bai Erik Bretos futbol zuzendariak udan adierazi zuten denboraldi honetan beste aurrerapauso bat eman nahi dutela Europan. Horrek esan nahiko luke gutxienez final-zortzirenak gainditzea. Realak 1998tik darama halakorik lortu gabe. Orduan txuri-urdinek Moskuko Dinamo utzi zuten kanpoan, UEFAko kopan —txapelketa hori jada ez da jokatzen—.
Iazko Espainiako Kopan Pelllegrio Matarazzok erakutsi zuen trebea dela joan eta etorriko kanporaketak prestatzen eta gainditzen. Baina kanporaketetarako sailkatzeko taldeak lehen 24en artean sailkatu behar du lehen ligaxkan —36 talde dira guztira—. Lehen zortzi tokietan amaituz gero, gainera, final-hamaseirenetako kanporaketa saihestu, eta zuzenean sailkatuko da final-zortzirenetarako.
Ligaxkan zortzi partida jokatuko ditu, lau etxean eta beste horrenbeste kanpoan. Matarazzok zuzentzen duen taldeak aurkari gogorrak izango ditu: Juventus, Crystal Palace eta Lyon, besteak beste. Bornemouth ere multzo horretan dago. Ingalaterrako taldea estreinakoz arituko da Europako txapelketa batean —Realak 21. aldia du—, baina, Andoni Iraolaren eskutik, Ingalaterrako ligan nabarmen egin du gora azken bi denboraldietan. Iraolak, ordea, Liverpoolekin fitxatu zuen udan, eta orain Marco Rouse da gerezien taldearen prestatzailea —hala deitzen diote Bornemouthi— eta hazkunde horri segida eman nahi diona.
«Haiek goian egingo dute presioa, baloia berreskuratu eta erasora jotzeko. Oso adi egon beharko dugu defentsako lanean»
Pellegrino Matarazzo Realeko entrenatzailea
Denboraldia gorabeheratsu hasi duten bi talderen arteko partida izango da biharkoa. Realak sei partida jokatu ditu ligan, eta hemezortzi puntutik zazpi bildu ditu: bi garaipen, berdinketa bat eta hiru porrot. Rousek zuzentzen duen taldeak, aldiz, lau partida jokatuko ditu, eta oraingoz ez du irabazi Premier Leaguen: hiru neurketa berdindu ditu, eta bat galdu. Haien jokalaririk erabakigarrienak Alex Scott, Tavernier Evanilson, Justin Kluivert eta Rayan dira.
Baina horiek alde batera utzi, eta biharko partidan jarri du arreta Matarazzok. «Lehia biziko norgehiagoka izango da. Haiek goian egingo dute presioa, baloia berreskuratu eta erasora jotzeko. Oso adi egon beharko dugu defentsako lanean, eta ahalik eta gehien izan behar dugu baloiaren jabe. Hori eginez gero, aukera gehiago izango ditugu irabazteko».
Marin bai, Zubeldia ez
Igandean Atletico Madrilen aurka 3-0 galtzea kolpea izan zela aitortu du, baina taldea ondo dagoela berretsi du: «Uste dut, erakutsi dugunerako, merezi genuen baino puntu gutxiago ditugula. Baina orain garrantzitsuena Europa liga da. Hutsetik hasiko gara, eta ondo ekin nahi diogu txapelketari. Ligaxka lehen zortzien artean amaitu nahiko genuke. Zortzi partida ditugu hori lortzeko».
Txuri-urdinen entrenatzaileak ez du aurreratu nahi izan txandakatzerik egingo duen. «Hamaikako indartsu bat aterako dugu, partida irabazi ahal izateko». Igor Zubeldia ez da garaiz osatu, eta, igandean bezala, deialditik kanpo geratu da; baita Jon Mikel Aranburu ere. Atzealdean aritzen den hegalekoari txartel gorria atera zioten Realak Europan jokatu zuen azken partidan, Manchester Uniteden kontra, eta zigortuta dago. Denboraldi honetan lehen aldiz sartu da deialdian, berriz, Pablo Marin, min hartuta egon ostean.
Reala: Remiro; Fort, Jon Martín, Sarr, Sergio Gomez; Yangel Herrera, Soler; Barrenetxea, Ochieng, Oiarzabal eta Oskarsson.
Bournemouth: Di Gregorio; Smith, Hill, Silva, Truffert; Adams, Scott, Kluivert; Rayan, Tavernier eta Evanilson.
Epailea: Paweł Raczkowski (Polonia).
Tokia: Anoeta.
Ordua: 21:00 (Movistar+).
