Amaitu da zesta puntako Nazioen Liga, pilotako euskal selekzioa ofizialki lehiatu den txapelketa. Mugarri handia, gogoangarria. Parte hartzea izan da saririk handiena, preziatuena, aspaldiko lanaren eta aldarrikapenaren fruitu. Baina izan da beste saririk: urrezko domina bat, eta zilarrezko beste bat. Gizonezkoetan txapeldun izan baitzen atzo euskal selekzioa. Aritz Erkiagak eta Imanol Lopezek bi seten aldeaz irabazi zieten Ludovic Laduxi eta Thibault Basqueri —Frantziarekin aritu dira—. Lehenengoan 15-13 gailendu ziren, eta bigarrenean 15-11. Festa lehertu zen Gernikako Jai Alai frontoian (Bizkaia), Basquek Lopezen pilotakada eraman ez zuenean. Jendez beteta zegoen pilotalekua. Emakumezkoetan bestelakoak izan ziren kontuak. Elaia Gogenolak eta Maia Goikoetxeak galdu egin zuten Erika Mugartegiren eta Arai Lejardiren kontra. Espainiarekin jokatu zuten Mugartegik eta Lejardik, eta 2-0 irabazi zuten: 15-4 eta 15-9. Gogenolak eta Goikotxeak zilarrezko domina kolkoratu zuten.
Erkiagak eta Lopezek urrezko domina eta txapela lortu zituzten. Garaipenari esker, euskal selekzioa Munduko Txapelketarako sailkatu da. Datorren urtean jokatuko da txapelketa hori, Argentinan. Finalerdietan espero baino gehiago kostatu zitzaien Erik Mendizabal eta Gorka Mugartegi mendean hartzea —Espainiarekin aritu dira—. Kostata aritu ziren, batez ere lehen setean. Laduxek eta Basquek, berriz, nahiz eta 2-0 irabazi, neurketa gogorra jokatu behar izan zuten Gorka eta Joan Sorozabalen aurka, AEBetako selekzioarekin aritu diren bi puntisten aurka.
Erkiaga eta Lopez 2-0 aurreratu ziren atzokoan, baina partida hasierako lehia gogorra izan zen oso. Ez bikote batek ez besteak ez zuten jokoaren ekimena ezartzea lortu, eta tanto luzeak izan ziren. Erkiaga eta Lopez saiatu ziren, baina batez ere Basquek lan ona egin zuen defentsan, eta Laduxe oldarkor aritu zen aurrean. Horri esker 8-6 jarri ziren aurretik. Ez ziren gustura eta eroso aritu Erkiaga eta Lopez. 11-8koarekin ataka zailean zeuden, eta atsedenaldia eskatu behar izan zuten. Baina bueltan, hurrengo bi tantoak Laduxek eta Basquek egin zituzten. 13-8arekin bazirudien eskura zutela seta. Baina ez zuten asmatu biribiltzen, erabaki txarrak hartu zituzten, eta 7-0ko partziala lortuta Erkiaga eta Lopez gailendu ziren: 15-13. Arnasa hartu zuten euskal selekzioko puntistek.
Parez pare aritu ziren bigarren setaren hasieran. Baina Lopez nagusitzen hasi zen atzean. Txapelketan egin duen partidarik onena egin zuen atzo. Pilota oso gutxi galdu zituen, eta bigarren set hasiera horretan pare bat tanto ikusgarri egin zituen, eta euskal selekzioak bi tantoren aldea lortu zuen: 6-4. Baina Laduxek eta Basquek sendo jarraitu zuten, eta ezin izan zuten partida hautsi. Alderantziz: 8-7 aurreratu ziren Laduxe eta Basque. Hortik aurrera, ordea, Laduxek bizpahiru pilota galdu zituen, eta horri esker 15. tantora hurreratu ziren Erkiaga eta Lopez: 12-9. Errentari ondo eutsi zioten, eta garaipena lortu.
Amaieran pozik mintzatu zen Erkiaga: «Batez ere lehen seta ez da batere erraza izan. Pazientzia izatea funtsezkoa izan da. Lortu dudan garaipen berezienetakoa da». Lopezek ere garaipenaren «balioa» berretsi zuen. «Presioa genuen, baina, zorionez, irabazi egin dugu».
Bigarren setean hobeto
Aurretik jokatu zen emakumezkoen finala. Asteazkenean neurtu zituzten indarrak ligaxkan; eta, orduan bezala, Mugartegi eta Lejardi nagusi izan ziren. Berehala lortu zuten aldea: 6-0, Mugartegik aurrean zuen ahala baliatuz. Gogenola eta Goikoetxea urduri aritu ziren hasiera horretan. Baina pixkanaka Gogenola jokoan sartzen joan zen aurrean, eta pare bat tanto egin ahal izan zituzten. Ez zuten lortu, ordea, Mugartegiri pilota kentzea, eta hasieran bezala atzean egin zuen min hark. Goikoetxea estu hartu zuen, eta lehen seta erraz irabazi zuten: 15-4.
Bigarren setari beste era batera ekin zioten euskal selekzioko bi pilotariek. Pare bat tantotan jokoa menderatzea lortu zuten, eta horri esker lehen aldiz aurretik jarri ziren: 3-1. Mugartegi jokoan ez sartzea lortu zuten, eta atzean saiatu ziren min egiten. Neurketako unerik onenak horiek izan ziren, eta horrek hauspoa eman zien, lehen seteko urduritasunak bazterrean uzteko, besoa askeago zabaltzeko. Lehen seteko egoerarekin alderatuz oso bestelako itxura eman zuten. Mugartegik eta Lejardik gogorrago aritu behar izan zuten tantoak lortzeko. Dena den, nagusi izatea lortu zuten, bai tanto batzuetan ahal handiagoa erakutsi zutelako, bai une batzuetan Gogenola behar baino presa handiagoz aritu zelako. Azkenerako 159 gailendu ziren.
Galdu arren, gustura ziren Gogenola eta Goikoetxea. «Asteazkenean baino gusturago goaz etxera. Ez dugu lortu haiek baino gehiagoa izatea, baina gure jokoa egin ahal izan dugu, batez ere lehen setean. Esperientzia ederra izan da euskal selekzioarekin debuta egitea txapelketa ofizial batean», esan zuen Gogenolak. Goikoetxea antzera mintzatu zen. «Hasieran apur bat urduri aritu gara, baina pozik gaude egindako lanarekin». Sari banaketan txalo zaparrada jaso zuten euskal selekzioko ordezkariek, eta txistu ozenak jo zituzten Espainiako ereserkia entzun zenean.
Sari banaketaren osteko hitzartzean, Xavier Cazaubon Nazioarteko Pilota Federazioko presidenteak «bakezko kultura» aldarrikatu zuen, dei egin zuen batasunera eta «Gernikako kontsentsura» batzera. Eskertuta mintzatu zitzaien antolatzaileei, zaleei eta pilotariei. «Zer litzateke Euskal Herria pilotarik gabe» galdetuz amaitu zuen hitzartzea. Joxe Mari Mitxelena Euskadiko Pilota Federazioko presidenteak, berriz, Agur, Jaunak abesten jarri zuen pilotaleku osoa.
