Silvia Ederra eskubaloi jokalari izandakoa hil da gaur, 43 urte betetzen zituen egunean. Gaixorik zegoen. Duela bi urte ebakuntza bat egin zioten obarioetako tumore bat kentzeko. Ederrak iaz hartu zuen erretiroa. 30 urte baino gehiago egin zituen eskubaloian jokatzen, horietatik hogei gorenean.
Jaioterrian hasi zen jokatzen, Lizarrako (Nafarroa) Itxakon, 8 urterekin. Gerora, lau taldeetan jokatu zuen: Mar Alacanten, Castro Urdialesen, Bera Beran eta Sporting La Riojan. Donostiako taldearekin irabazi zituen bere kirol ibilbideko txapel guztiak, hamahiru guztira: bost aldiz irabazi zuen Espainiako Liga, bost aldiz Superkopa eta hiru aldiz Kopa.
Sportingen aritu zen azken urteetan. Bitan hartu zuen erretiroa: lehenbizi 2020an, baina hiru urte geroago itzuli zen. Hain zuzen, aldi horretan gaixotu zen lehen aldiz, baina bi hilabete geroago lehiara itzuli, eta beste bi urtez jokatu zuen. Erretiratu zenean, «kontent» zen egindako bidearekin, baina pena handi bat bazuen: Itxako desagertzen ikusi izana.
