Traineru guztiek nahi dute Kontxan lehiatu, eta nerbioak pil-pilean izaten dituzte arraunlariek. Sailkatze estropadan, gainera, urtero izaten dira ezustekoak. Bada, aurten, ezohikoa izan da gertatutakoa. Zarautzek eman du ezustekoa, denbora onenetan bosgarren izan baita, baina, behin estropada amaitutakoan, hamar segundoko zigorra jarri diote epaileek. Izan ere, ebatzi dute patroiak behar baino lehenago askatu duela estatxa.
Kolpe gogorra hartu dute, eta halaxe esan du Juanjo Etxarte entrenatzaileak: «Ospatu ondoren jakin dugu, eta min eman digu. Neskak lur jota daude. Orain, kanporaketetarako prestatuko gara». Esku-eskura izan du Zarautzek Kontxarako aurrenekoz sailkatzea, eta modurik mingarrienean geratu da handik kanpo ETE ligako txapelduna.
Batzuen pena, besteen poza. Zumaiak hartu du Zarautzen tokia. Euskotren liga laugarren amaitu du Saregileak ontziak, baina pattal aritu da gaur. Hala ere, gutxien espero zutenean, saria izan dute. Zarautzi jarritako zigorrak modua eman die Kontxarako sailkatzeko.
Azkenean, Euskotren ligako zortzi ontziak lehiatuko dira hurrengo bi igandeetan: Orio, Tolosaldea, Donostiarra, Hibaika, Hondarribia, Astillero, Zumaia eta Arraun Lagunak —Lugañene ontziak ez du lehiatu behar izan, hura baita ligan ondoen sailkatu den Donostiako trainerua—.
Uste baino hobeto aritu dira Donostiarra eta Hondarribia. Bantxa traineruak lehen aldiz jokatu du sailkatze estropada, eta arraunlariek sasoiko lan onena egin dute. Presiopean bikain aritu dira, eta hirugarren egin dute, atzekoei aldea aterata. Etxekoa dute bandera, eta ez diote utzi ihes egiten. Gainera, kanporaketetara begira ere bete-betean daudela demostratu dute.
Bestalde, ligan maila galdu duen Hondarribia ere ederki aritu da. Poparean oso luze ona egin dute, eta merezita sailkatu dira. Azkenean, ontzi azkarrenen artean bosgarrena izan da. Hala esan du Miren Garmendia patroiak: «Oso pozik gaude. Denboraldia gogorra izan da, baina sari politarekin bukatu dugu; ezin dugu gehiago eskatu».
Halere, Kontxan sartzeko lehian, borroka estua izan dute hainbat ontzik, eta horietako bat izan da Ama Guadalupekoa: joaneko luzea ia parean egin dute Hondarribiak, Zumaiak, San Juanek eta Zarautzek. Lau ontzien artean bi segundoren aldea baino ez dute izan. Brankaz makalago joan da Astillero, baina poparean irauli du kontua. Eta zertxobait azkarrago aritu da Hibaika.
Den-denek zuten lehen zazpien artean amaitzeko aukera. Hain justu, estropada bukatu arte zaila zen jakitea nola geratuko zen sailkapena. Lehiatzen azkenak Hibaika, Astillero eta Chapela izan dira. Hibaika helmugaratu denean, kanpoan utzi du San Juan. Eta Astillero arraunean ari zela, erabakitzeke zegoen zortzigarren postua —jakin gabe Zarautz zigortu egingo zutela—. Azkenean, Zumaiaren denbora hobetu dute kantabriarrek.
Faboritoak, aise
Bazeuden onenen artean muturra sartu nahi zuten hainbat ontzi. ETE ligan puntan aritu diren Zarautz eta San Juan, Galiziako liga irabazi duen Chapela eta bigarren egin duen Tiran... Baina, azkenean, inork ez du amestutakoa lortu. Zarautzek eta San Juanek izan dute gertuen. Zortzigarren izan da Batelerak, eta bederatzigarren Enbata —zigorra aplikatuta—. Chapela koxka bat beherago aritu da, eta Tiranek ere urruti izan du sailkatzea.
Azken bi urteetan ezustekoa eman duen Kaikuk ere ez du balentria errepikatu, nahiz eta hura izan den B multzoan denborarik onena egin duen ontzia —Tiranen aurretik amaitu du—. Hamaikagarren egin du.
Kontxako Bandera irabazteko ontzi faboritoek, Oriok eta Tolosaldeak, ez dute huts egin. Orio izan da azkarrena, nabarmen, eta erraz apurtu du aurretik Zerkausia ontziak ezarritako marka. Ia zazpi segundo lehenago helmugaratu da. Lan erdietarako dezenteko aldea atera die aurkariei. Arraun Lagunak Euskotren ligako txapelduna da Kontxako Bandera lortzeko hautagairik indartsuena, baina azken hitza esateko dute oraindik Oriok eta Tolosaldeak. Erraz, behintzat, ez diote jarriko.
Baldintza gogorretan egin dute arraun gaur traineruek: haize ufadekin eta olatuekin. Ez da giro izan arraunerako, baina bai ikuskizunerako: jendetza bildu da badian. Eta berotze ariketa baino ez da izan. Hurrengo bi datak dituzte egutegian gorriz markatuak arraunlariek eta arraunzaleek: irailaren 7a eta irailaren 14a.
