Kaixo, irakurle. Atzerrian bizitza berri bat eraikitzen saiatzen den mutil baten inguruko film bati buruz hitz egin nahi dizut gaur. Bai, Gerard Oms-en Molt Lluny-ri buruz.
Filmak Sergioren istorioa kontatzen du. Espanyol futbol taldearen UEFAko Kopako partida bat ikustera doa Utrechtera anaiarekin. Aireportura bueltan zihoala, topo egiten du lanean ari den gazte batekin —Yusufekin—, eta zerbait pizten dio barruan. Hegazkinera igo baino lehen, bertan geratzea erabakitzen du.
Gogoan izan: lan hori 2008an kokatzen da, krisi ekonomiko gogorraren garaian, Espainian gazte askok lanik topatzen ez zuten garaian. Sergio ez da gai bere familiari azalpen logikorik emateko, eta, errealitateari bizkar emanez, iragana mozten du. Hortik aurrera, tokiko hizkuntza ezagutu gabe iraun beharko du etxetik urrun. Bere bidaiak, ordea, ez du soilik bizirik irautearekin zerikusia: bere barneko hesiekin, beldurrarekin eta emozioekiko distantziarekin ere topo egingo du. Utrecht, hiri hotz eta arrotza, metafora bilakatzen dela esan daiteke: Sergioren barne-emozionalaren isla.
Omsek ausardiaz ekartzen ditu pantailara gai konplexuak: immigrazioa, arrazakeria, sexualitatea, bakardadea eta 2000ko hamarkadaren amaierako krisi ekonomikoaren arrastoa. Baina pelikula ez da beti iluntasunean geratzen. Laguntza eta elkartasuna ere ageri dira.
Molt Lluny ez da soilik Sergioren istorioa: belaunaldi oso baten kontakizuna da, erbesteratzea eta bizirautea uztartzen dituena. Gazte askoren migrazio ekonomikoa, aukera berrien bilaketa eta norberaren lekua aurkitzeko ahalegina. Izan ere, denok sentitu gara noizbait oso urrun norberaren bila, bai geografikoki eta bai emozionalki. Agian hori da pelikula honek utzi nahi digun mezuetako bat. Askotan, gure barnea aurkitzeko bide bakarra gure erosotasun-gunetik ateratzea da. Ez da beti erraza, ez da beti samurra, baina urruntasunak perspektiba ematen digu eta ezagutzen ez genituen indarrak erakusten dizkigu. Horregatik, Molt Lluny ez da soilik erbesteratzearen edo krisiaren kontakizuna, baizik eta norbere burua ezagutzeko aukera baten parabola ere bada.
Aitortu beharra dut hasieran esperantza handirik gabe hasi nintzela ikusten, baina harrapatu egin nau. Eta horregatik gonbidatzen zaitut Filmin plataforman ikustera: agian, zure urruntasunean ere ispilu bat aurkituko duzu.
