Basakabi jada ez da udaleku bat izango, Wellington Music Academy entzutetsuaren Euskal Herriko egoitza baizik. Hala iragarri du EITBk, Go!azen telesailaren hamahirugarren denboraldia udan grabatuko dutela jakinaraztearekin batera. Musika eskola horretan sartzeko, azterketa zorrotz bat gainditu beharko dute hiru ikaslek: Ilargik (Maren Alonso), Kaiak (Ane Sarasua) eta Lukak (Gaizka Fernandez). Wellington Music Academytik etorritako musika irakaslea Imanol izango da, eta Iñigo Gastesi aktoreak jokatuko du haren rola.
Urtero bezala, denboraldi berriko argazkiak egin eta udako bideoklipa grabatu dute telesailaren denboraldiko atalak grabatzeari ekin aurretik. Bideokliperako irudiak astelehenean filmatu zituzten, Azpeitiko (Gipuzkoa) Ekoetxean, Itziarko Itxaspe kanpinean (Deba, Gipuzkoa) eta Donostiako El Pinar jauregian. Aurreko urteetan bezala, Iker Lauroba musikariak sorturiko kantu bat izango da bideokliparen oinarri.
Aktore berriez gain, aktore hauek ere ariko dira hamahirugarren denboraldiko ataletan: Nerea Arriola, Nerea Elizalde, Adriana Sanchez, Ander Aierza, Irati Marin, Jon Alonso, Ainhoa Tabuio eta Leire Nuñez. Bestalde, Julen Taboada aktore gazteak aurreko denboraldian baino parte hartze handiagoa izango du. Basakabi jada ez da Basakabi, ordea.
