Apirilaren 20tik maiatzaren 19ra bitartekoa Euskal Literaturaren Hilabete izendatu du EITBren Guau audio plataformak. Liburuaren Eguna tarteko, apirilaren 20an hasi ziren audioliburu berri batzuk doako plataforman sareratzen. Miren Amuriza bertsolari eta idazlearen Pleibak eleberria apirilaren 20an jarri zuten plataforman, idazlearen ahotsean. Eta, atzo, Uxue Alberdiren Hetero ipuin liburua sareratu zuten, entzuteko moduan. Kasu horretan ere, idazleak berak jarri dio ahotsak berak sortutako istorioei —zortzi narrazio dira—.
Datozen hiru astearteetan, berriz, hiru audioliburu hauek jarriko dituzte Guau plataforman: Eider Rodriguezen Eraikuntzarako materiala, Toti Martinez de Lezearen L'Arratien taberna, eta Goiatz Labandibarren Bekatua.
On Time ekoiztetxeak sortu ditu audioliburu horiek guztiak EITBrentzat. Lehendik ere, Poesia Ttanttak bilduma sareratu zuen plataformak. Iaztik, beste liburu hauek ere entzun daitezke audio formatuan: Ramon Saizarbitoriaren Ehun metro; Arantxa Urretabizkaiaren Zergatik panpox; Anjel Lertxundiren Hamaseigarrenean aidanez eta Horma; Harkaitz Canoren Twist, Fakirraren ahotsa, Beti oporretan eta Telefono kaiolatua; Jon Arretxeren Xahmaran; Iban Zalduaren Etorkizuna; eta Toti Martinez de Lezearen Judu-kale.
