Juan Paredes Txiki-ri eta Angel Otaegiri buruzko dokumental bat ekoiztu du BERRIAk —1975eko irailaren 27an fusilatu zituzten, frankismoaren hondarrean—, eta Hamaika telebistan, Kanalduden eta Xaloa telebistan ikusi ahal izango da bihar, 22:00etan. Hamaikak etzi ere emango du, ordu berean.
Dokumentalean familiako kideen eta lagunen testigantzak bildu dituzte Gurutze Izagirre Intxauspe BERRIAko kazetariak, eta Lara Madinabeitia eta Garazi Karrera ikus-entzunezko saileko langileek. BERRIAren webgunean ere ikusgai dago dokumentala.
Eta Euskal Herrian bakarrik ez, Katalunian eta Galizian ere ikusi ahal izango da bihar BERRIAren lana: Vilaweb-ek eta Nós Diario-k ikusgai jarriko dute euren webguneetan.
