Lehen Eusko Jaurlaritzaren 90. urteurrenaren ospakizunen bueltan eta Venezuelako euskal diasporaren ibilbidea aitortzeko asmoz, lagunarteko futbol partida antolatu dute gaur Bilbon euskal selekzioaren eta Venezuelaren artean. San Mames estadioan jokatuko dute, eta han izaterik ez dutenek telebistaz eta Internet bidez ikusi ahalko dute lehia Hamaikan eta ETB1en 20:00etatik aurrera. Telebista konbentzionalean ez ezik, Hamaikak bere webgunean emango du, eta katearen Android TVrako aplikazioan ere ikusgai izango da.
ETB On plataforma digitalean ere ikusi ahalko da lehia. Hamaikaren emankizunean, kontakizuna Naiz irratiko esatariek egingo dute. Izan ere, euskarazko irrati horrek ere lehiaren kontakizuna egingo du zuzenean.
Bi selekzioak elkarren aurka arituko diren laugarren aldia izango da gaurkoa. Aurreko hiruretan, euskal selekzioak irabazi zuen. Jagoba Arrasate eta Mikel Labaka dira euskal selekzioaren hautatzaileak.
Bihar euskal derbia ETB1en
Emakumezkoen futbolean ere partida garrantzitsua jokatuko da asteburu honetan. Hain zuzen ere, Realak eta Athleticek Espainiako Ligako 11. jardunaldiko partida jokatuko dute bihar, 12:00etan, Donostian. ETB1 katean eta ETB On plataforman izango da ikusgai euskaraz; TVEko Teledeporte kateak, berriz, gaztelaniaz emango du —RTVE Play plataforman ere ikusteko modua izango da—.
