Hamaika telebistak beste programa bat estreinatuko du gaur, 22:00etan. Nafar anitz du izena saioak, eta bertan Nafarroako pertsona ezagunen bizitzetan murgilduko dira. Hamaikak iragarri duenez, «aurpegi ezagunaren atzean dagoen pertsona gertutasunez eta naturaltasunez erakustea» du helburutzat programa berriak.
Yasmine Khris Maansri itzultzaile eta kazetariak (Marseilla, Frantzia, 1996) aurkeztuko du saioa. Atal bakoitzean protagonista baten ingurune pertsonala erakutsiko du: bere etxea, herria eta ohiturak ezagutzeko aukera izango dute Hamaikaren ikus-entzuleek. «Ikusleari ohiko elkarrizketa agerpen publikoetatik harago doan begirada eskaintzea da xedea», iragarri du Hamaikak. Iruñeko egoitzako taldeak egingo du.
Asteartero emango dute saioa Hamaikan. Lurreko telebista digitalaren bidez zein kable bidez ikusi ahalko da, baita www.hamaika.eus webgunean eta Android TBrako aplikazioan ere.
Ez da lehen aldia Yasmine Khris Maansrik Hamaika telebistan saio bat aurkezten duena. 2021. urtean, Nafar away saioa aurkezteari ekin zion. Podcastgintzan ere aritua da: Iker Tubia BERRIAko kazetariarekin batera, Ongi egiten dugu Iruñekoak izateko jendaurreko podcasta aurkezten aritu zen —Laban egiten zuten, eta Euskalerria Irratiak ere ematen zuen—.
