Herritarrek konfiantza handiagoa dute hedabide pribatuetan

Metroscopiak egindako inkesta baten datuak plazaratu zituen atzo Bilbon Periodismo 2030 taldeak, Axa fundazioarekin batera. Datuen artean, Arabako, Bizkaiko eta Gipuzkoako herritarrek konfiantza handiagoa dute hedabide pribatuetan (%26), publikoetan (%20) baino. Bestetik, herritarrek konfiantza gehiago dute erkidegoko hedabideen informazioarekin (%28), egoitza nagusia Madrilen dutenekin (%22) baino. Hedabideen artean, telebista da informaziorako herritarrek gehien erabiltzen dutena: %82k ikusten dituzte albistegiak eta informazio saioak; ondotik, webguneak eta egunkari digitalak doaz (%59); irratia (%50); paperezko hedabideak (%41); eta sare sozialak (%39).

Arabako, Bizkaiko eta Gipuzkoako herritarren %57k pentsatzen dute hedabideak ez direla guztiz libreak edo independenteak.

Gazteen erdiak Tiktoken

Sare sozialen erabileran, adinak badu bere eragina: 18-29 urte arteko gazteen %46k Tiktok sare soziala erabiltzen dute. 65 urtetik gorakoen %93k, berriz, ez dute inoiz sare sozial hori erabiltzen. Bestetik, herritarren %78k ez dute inoiz Twitch erabili, eta %44k ez dute inoiz Instagram sare soziala erabiltzen.