Irailaren 1etik 6ra egingo dute aurten Gasteizko FesTVal jaialdia, eta bertan emango dituzten sarietako batzuk iragartzen ari dira jada. Klaudio Landa ETBko aurkezleak (Ea, Bizkaia, 1967) Joan Ramon Mainat saria jasoko du jaialdiko gala berezian.
Jaialdiak jakinarazi duenez, entretenimenduko eta aktualitateko saioetan aurkezle gisa egindako ibilbide luzeari esker emango diote saria. «Lanbiderako grina agorrezinez, Landak jakin du entretenitzea ez dela dibertitzea bakarrik, konektatzea baizik», gaineratu du FesTVal-ek. «Bere burua berrasmatzen, hunkitzen eta telebista jendearen hizkuntzan mintzarazten jakin du».
Landak Gaztea irratian hasi zuen ibilbidea, 1990eko hamarkadan, Euskadi Gaztea zen garaian. 1996an, Arralde saioa aurkezten hasi zen ETB1en. Ondotik iritsi ziren Hau da marka eta Kale gorrian programak. Sorginen laratza saioan, berriz, sona handia hartu zuen Landak —kolaboratzailea zen gaueko magazin hartan—.
ETB1en aurkeztu dituen beste saio batzuk hauek dira: Oh Happy Day, Debatea, Egunak egin du, Jateko modukoa, Baserria, Eztabaidan eta 11 entzuteko.
ETB2n, berriz, Esta es mi gente, Sin ir más lejos, El Programa de Klaudio eta Dinero a saco aurkeztu ditu, besteak beste.
Uda honetan, jaietako suen saio bereziak aurkeztuko ditu ETB1en, Ilaski Serranorekin batera: Donostiako Su Artifizialak eta Bilboko Su Artifizialak aurkeztuko dituzte abuztuan, bi hiri horietako aste nagusiak ospatzen dituzten egunetan.
