Kontxako Bandera jokatu zuten atzo Donostian, eta ikus-entzule askoren arreta bereganatu zuen. ETB1eko emanaldiak %27,3ko ikusle kuota lortu zuen —igandean EAEn gehien ikusi ziren hamar emankizunetako bat izan zen—. Hala ere, 2023ko Kontxako Banderak askoz datu handiagoak izan zituen: %39,3ko kuota gizonezkoen estropadak, eta %31,7koa emakumezkoenak.
Beste alde batetik, atzo egun osoan EAEn futbol partida bat izan zen gehien ikusi zen emanaldia: UEFAko Nazioen Liga txapelketako Suitza-Espainia partida. %27,8ko ikusle kuota bereganatu zuen —135.000 ikus-entzule—. Igandean gehien ikusi ziren bigarren eta hirugarren emankizunak ETB2ko Teleberri albistegikoak izan ziren. ETB1ek astelehen gauetan ikusle datu onak lortzea espero du aurten; izan ere, datorren astetik aurrera Espainiako Ligako euskal taldeen partidak emango ditu zuzenean.
Udan ETBk ikusle datu «zoragarriak» izan dituela adierazi zuen joan den astean Euskal Telebistako zuzendari Unai Iparragirrek, Gasteizen. Abuztuan, ETB1ek %2,3ko ikusle kuota lortu zuen; ETB2k, %8,2koa; ETB3k, %0,1ekoa; eta ETB4k, %1,2koa. EAEn hilabete horretan gehien ikusi zen katea La1 izan zen —horretan eragin handia izan zuten Parisko Olinpiar Jokoek—.
