Iazko urrian, Arantxa Etxebarria zinemagilearen La Infiltrada filma estreinatu zuten zinema aretoetan. Lehenbizi ezker abertzalean eta ondotik ETA erakundean infiltratu zen polizia baten istorioa kontatu zuen zinta hark. Urtebete geroago, Netflix plataformak Un fantasma en la batalla filma estreinatuko du aurtengo urrian. Film horretan, emakumezko guardia zibil gazte bat ETAn infiltratuko da, eta hori izango da fikziozko zintaren ardatza. 1990eko eta 2000ko hamarkadetan girotuta egongo da.
Urriaren 3an estreinatuko dute filma Hego Euskal Herriko, Herrialde Katalanetako, Galiziako eta Espainiako zinema areto komertzialetan. Ordainpeko plataformara, berriz, handik bi astera iritsiko da: urriaren 17an.
Agustin Diaz Yanes Espainiako zinemagileak zuzendu du Un fantasma en la batalla. Susana Abaitua aktoreak (Gasteiz, 1990) du rol protagonista: Amaia. Netflixek iragarri duenez, guardia zibila da Amaia, eta ETA barruan murgilduko da agente ezkutu gisa, erakunde armatuak Ipar Euskal Herrian zituen zuloak non zeuden jakin nahian. Euskal Herriko hainbat herritan grabatu zuten filma iazko udaberrian.
Abaituarekin batera, aktore taldean dira Iraia Elias, Andres Gertrudix, Raul Arevalo eta Ariadna Gil. Ekoizleak Belen Atienza, Sandra Hermida eta J. A. Bayona dira; haiena da La sociedad de la nieve filma, Netflix plataforman arrakasta handia lortu zuen ekoizpena.
Berriki, ETArekin lotutako fikziozko telesail bat estreinatu du Amazon Prime Video plataformak: La Frontera. TVEk ekainean emango zuela iragarri zuen, baina atzeratu egin du estreinaldia.
