Literaturan, hormetan, publizitatean eta beste hainbat esparrutan aritu zen Amaia Arrazola (Gasteiz, 1984-Bartzelona, 2025). Publizitatea ikasi zuen, eta arlo horretan lan egin zuen lehen urteetan. 2010ean publizitatea alde batera utzi, eta marrazkigintzari heldu zion buru-belarri. 23 urte zituela hasi zuen ilustratzaile ibilbidea Kataluniako hiriburuan, eta bertan bizi zen geroztik.
Hamaika lan argitaratu zituen bere ibilbide profesionalean, eta zerrenda luzea osatu zuen. 2015ean, Pequeña y Grande, Audrey Hepburn lana argitaratu zuen; Historia Garaikideko hainbat emakumeren bizitzak ditu ardatz Pequeña y Grande bilduma. Lan ospetsuenen artean daude, besteak beste, Waba Sabi (2018) eta Totoro y yo (2022) liburuak; Asiako kulturarekin lotura zuzena dute gehienek. Amatasunari lotutako El meteorito liburua ere argitaratu zuen 2020an, eta azken lanen artean dago Buenas noches, Simon, haurrentzako liburua.
Lan gehienak Bartzelonan eta Japonian egin zituen arren, Euskal Herrian ere egin zuen geldialdirik. Iaz, esaterako, Gasteizko jaietako kartel lehiaketa irabazi zuen, Zeledonen jaitsiera lanari esker.
ikusi gehiago
Literaturan ez ezik, horma irudietan ere proiektu ugari egin zituen. Horien artean dago, besteak beste, iaz Bartzelonan egin zuena, Gracia barrutian. 86 metro luzeko horma marraztu zuen Arrazolak, Gracia auzoari omenaldia egiteko. Urtaroetan banatuta dago lana, eta urteko sasoi bakoitzean auzoan egiten diren hainbat jai eta jarduera irudikatu zituen. Aurten bertan egin zuen azken horma irudia, Cirque du Soleilen ikuskizun baterako.
