'Amour' filmari emango diote Fipresci saria, Zinemaldian

Zinematografiako Kritikarien Nazioarteko Federazioak (Fipresci) Donostiako Zinemaldian eman ohi du bere saria, eta aurten Michael Hanekeren Amour filma aukeratu du. Mundu osoko 225 kritikarik erabakitzen dute nor saritu, azken urtean estreinatutako filmak kontuan hartuta. Ramon Agirrek parte hartu du filmean, eta Zinemaldiko antolatzaileek jakinarazi dute aktore donostiarrak berak jasoko duela Fipresci saria inaugurazio galan, Hanekek ezin izango duelako Donostiara etorri. Amour-ek, gainera, Zabaltegi-Perlak saila irekiko du.

80 urtetik gorako bikote baten istorioa kontatzen du. Musika irakasleak dira, eta Parisen bizi dira, luxuko pisu batean. Halako batean, burmuineko infartu bat izango du emakumezkoak, eta, horren ondorioz, ia-ia erabat elbarri geratuko da. Horrek emakumea egun osoan zaintzera behartuko du gizona. Urrezko Palma irabazi zuen aurtengo Cannesko zinema jaialdian. Haneke bera 2009an ere gailendu zen Fipresci sarian, Das Weisse Band-ekin