Aurkeztu dute 2024ko Arabako Bertsolari Txapelketa. Arabako Bertsozale Elkarteak Baranbioko (Amurrio, Araba) Garrastatxu Txokoan egin du agerraldia, eta han azaldu dituzte txapelketaren nondik norakoak. Finala Gasteizko Printzipal antzokian izango da, martxoaren 16an, eta lehiari urtarrilaren 28an ekingo diote.
Tarte horretan hiru final-laurden eta bi finalerdi jokatuko dituzte. Final-laurdenak Izarran, Oionen eta Laudion, eta finalerdiak Aramaion eta Dulantzin. Hemezortzi bertsolarik parte hartuko dute: 2022ko finalean izan ziren bostek eta udazkeneko kanporaketen bidez sailkatu diren hamahiruk. Tartean dira Peru Abarrategi egungo txapelduna eta Manex Agirre txapeldunordea. Bederatzi epaile ere ariko dira, eta hamahiru gai jartzaile arduratuko dira gaiak sortzeaz.
Prentsaurrekoan, Arabako bertsogintzak azken hamarkadetan egin duen bidea izan dute hizpide. Txapelketak izan dituen geldiuneak nabarmendu dituzte, eta gogorarazi dute aurten berrogei urte beteko direla Arabakoa lehen aldiz jokatu zenetik. «Beraz, bada zer ospatu», adierazi dute.
Kanporaketetarako sarrerakBertsosarrerak.eus webgunean erosi ahalko dira, eta finalekoak, berriz, Printzipal antzokiaren salmenta bideetatik.
