Badator Arabako Bertsolari Txapelketa. Gaur aurkeztu dute Gasteizko Izaskun Arrue Kulturgunean, eta han eman dute nobedadeen berri: azken txapelketako finala, 2024an, Gasteizko Printzipal antzokian egin zuten, baina oraingoan, 2022an bezala, Europa biltzar jauregiko Almudena Cid aretoan abestuko dute Arabako bertsolari onenek, martxoaren 28an.
Hemezortzi bertsolarik hartuko dute parte txapelketan: 2024ko Arabako Bertsolari Txapelketaren finalean kantatu eta izena eman duten lau finalistak —Manex Agirrek eta Paula Amilburuk ez dute parte hartuko aurtengoan—, 2025eko udazkeneko sailkapen faseko saio bakoitzeko irabazleak, eta puntuazioaren arabera lehenengo hamalauen artean sailkatu zirenak.
Lehen Faseko saioetan ariko diren bertsolariak
- Oionen, otsailaren 7an. Aroa Arrizubieta, Felipe Zelaieta, Iñaki Viñaspre, Martin Abarrategi, Sabin Abarrategi eta Unai Anda.
- Laudion, otsailaren 15ean. Aitor Ugarte, Andere Arriolabengoa, Ekaitz Samaniego, Hegoi Amabizka, Manu Bendala eta Peru Abarrategi.
- Izarran, otsailaren 21ean. Asier Otamendi, Danel Herrarte, Eli Zaldua, Maddi Agirre, Rikardo Gonzalez de Durana eta Xabi Igoa.
Finalaurrekoetara hamabi pasatuko dira, eta finalera sei. Lau dira 2024ko txapelketan parte hartu ez zuten baina aurten arituko diren bertsolariak: Andere Arriolabengoa, Hegoi Amabizka, Manu Bendala Garcia-Donas eta Sabin Abarrategi.
Guztira sei saio izango dira. Lehen fasean hiru: Oionen otsailaren 7an, Laudion otsailaren 15ean eta Izarran otsailaren 21ean. Lehen finalaurrekoa, berriz, Dulantzin izango da martxoaren 7an, eta bigarrena Aramaion martxoaren 14an. Saio guztiak 18:00ean hasiko dira, finala izan ezik. 17:30ean ekingo diote horri. Sarrerak urtarrilaren 22an jarriko dituzte salgai www.bertsosarrerak.eus webgunean.
Gaurko aurkezpen ekitaldian izan dira txapelketan parte hartuko duten bertsolari gehienak, baita Arabako Bertsozale Elkarteko kideak ere.
Hitza hartu dute Egoitz Iradier elkarteko sustapen arduradunak eta Uxue Diaz de Cerio sustapen eragileak, eta hizpide izan dute, besteak beste, Arabako Bertsolari Txapelketak 1982. urtean lehenengoa jokatu zenetik egindako bidea.
