ASKOREN ARTEAN
'Zulu Guitar Blues'
Diskoetxea: Matsuli Music.
Badira Hegoafrikako jazz grabazio arraroak berrargitaratzen ari diren diskoetxe batzuk, tartea, Matsuli Music. Bada, oraingoan 1950etik 1965era bitarte grabatutako bakarlarien doinuak bildu dituzte. Grabazio horretarako, zigiluak sekulako lana egin du arbelezko 78 rpm diskoetan jasotako kantuok zaharberritzeko, eta, ondorioz, soinua oso perfektua da. Musikari dagokionez, bluesman zaharren manerak eta trobadoreen istorioak gailentzen dira, hau da, gitarra eta ahotsa, bestelako estiloei bizkarrik eman gabe: hawaiiar kutsuko abestiak, folk melodiak, Afrikako tradizioa... Kantuok garaiko egoera soziopolitikoaren isla ere badira.
