21 talde eta 5 DJ batu dituzte Bat-batean jaialdiaren lehen kartelean, honako hauek: Añube, Apotheke, Brigade Loco, Bull Brigade, Etxepe, Hell Beer Boys, Hofe, Jarfaiter, La Elite, La Txama, Lukiek, Metrika, Nafarroa 1512, Nerve Agent, Roy Ellis, Safu, Santa Salut, Segismundo Toxicomano, Skabidean, Tatta eta Xiberoots taldeak eta Carlos Perez, K-Style, Malakias Mx3, Malandro eta Rosa Mari disko jartzaileak. Maiatzaren 15ean eta 16an izango da Bat-batean, Gasteizko Mendizabalan. Falta diren izenen berri urtarrilaren erdialdean emango dutela iragarri dute antolatzaileek, Gasteizko Jimmy Jazz aretoko kideek.
Azaldu dutenez, Arabako eta Euskal Herri osoko gazteak elkartzeko xedez sortu dute Bat-batean jaialdia. Bi eszenatoki nagusi izango ditu, baita karpa bat ere, musika eta programazio propioarekin. Horrez gain, jantokiak eta atseden hartzeko guneak ere egokituko dituzte. Programazioa osatzerakoan, estiloen ugaritasuna izan dute kontuan Jimmy Jazz aretokoek, eta rocka, punka, rapa, popa eta musika elektronikoa uztartu dituzte, gustu guztietako ikus-entzuleengana heltzearren.
Sarrerak abenduaren 16an jarriko dituzte salgai, www.batbatean.eus webgunean, 10:00etatik aurrera. Lehen 1.000 sarrerak 40 euroan salduko dira; ondokoak, 45 euroan.
