Ludwig van Beethoven konpositorea jaio zela 250 urte beteko dira abenduan, eta urtemuga hori gogoratuko du Donostia Kulturak iraileko lehenengo astean. Sei kontzertu programatu ditu, guztiak ere konpositore alemaniarraren obrak ardatz izango dituztenak. Ensemble Siciliano laukoteak hasiko du emanaldi zikloa irailaren 1ean Viktoria Eugenia antzokian, eta talde berak emango du azken kontzertua, hilaren 6an, areto berean. Gainerako kontzertuak lau pianistak emango dituzte: irailaren 2an, Juan Carlos Fernandez-Nietok; 3an, Nikos Stavlasek; 4an, Judith Jauregik; eta 5ean, Josu Okiñenak. Saio guztiak Viktoria Eugenia antzokian izango dira.
Atzo eman zuen Donostia Kulturak abuzturako eta irailerako musika eta antzerki programazioaren berri, eta, arte eszenikoen alorrean, antolatzaileek umorearen alde egin dute, nabarmen, eta komedia nagusi izango da Donostian taularatuko dituzten antzezlanetan. Horien artean, Jon Plazaolaren Irabazi nabarmendu beharra dago, erabateko estreinaldia izango baitu abuztuaren 26tik 30era. Gaur egungo gizarte lehiakorrari buruzko komedia da, eta Antzoki Zaharrean emango dute. Dagoeneko estreinatuak dauden beste antzezlan batzuk ere izango dira Donostian. Hala, Izena! —Ene ba! antzezlanaren izenburu berria— eramango du Txalo konpainiak abuztuaren 13tik 16ra Antzoki Zaharrera. Begoña Bilbaok zuzendu du obra, eta Asier Sota, Ane Gabarain, Mikel Laskurain, Joxe Kruz Gurrutxaga eta Alazne Etxeberria ditu protagonista.
Donostia antzerki saria
Antzerkiaren Nazioarteko Egunarekin bat eginez banatu izan dute Donostia antzerki saria, martxoaren 27an, baina, aurten ezin izan zenez ekitaldia egin, Atx Teatroak irailaren 8an jasoko du, Viktoria Eugenian, Zazpiak bat obragatik irabazitako saria. Ondoren, antzezlana taularatuko du.
Irailean Donostian emango dituzten euskarazko beste bi antzezlanak ere Txalo konpainiarenak izango dira: Rita —Joseba Apaolaza eta Aitziber Garmendiarekin—, 9tik 12ra, Antzoki Zaharrean; eta Zoaz pake santuan —Ane Gabarain eta Mikel Laskurainekin—, 27an, Imanol Larzabal kultur etxean.
Gaztelaniazko beste hainbat antzezlan ere programatu dituzte abuztu eta irailerako: Mentiras inteligentes (abuztuaren 5etik 9ra), La fiesta del chivo (abuztuak 5-9), El método Gronholm (abuztuak 11-16), La herencia (abuztuak 19-23), La habitación de Maria (abuztuak 19-23), La sumisión, y el porvenir está en los huevos (abuztuak 28-29), Coppelia, el cuento de la niña de los ojos de porcelana (abuztuak 30), Cuidados intensivos (irailak 3-6) eta Desmontando a Séneca (irailak 10-13).
