Bertsoaroa izango da otsailaren 9tik martxoaren 2ra

BERTSOLARITZA.Nafarroako Bertsozale Elkarteak jakinarazi du Bertsoaroa jaialdia otsailaren 9tik martxoaren 2ra bitarte eginen dela aurten, Iruñean. Datak iragarri ez ezik, kartela ere aurkeztu du elkarteak, eta egitarau oparoa utzi agerian: sei emanaldi eginen dituzte, hala nola bertso jaialdiak, bertso afari bat eta haurrentzako tailer bat. 32. aldia izanen du aurten.

Ohi denez, Bertsozale Elkarteak Iruñeko Udalarekin batera antolatu du zikloa. Zabaldutako oharrean, biek nabarmendu dute Bertsoaroaren helburua «unean uneko bertsolaritzaren berri kalitatez eta aniztasunez ematea» dela.

Aurreko aldietan bezala, haurrei ere erreparatu diete egitaraua ontzeko garaian, eta haiei eskainitako jarduera bat ere antolatu dute. Bertso jasa, bat-bateko jolasa tailerra eginen dute otsailaren 18an, Arrosadia auzoko Civivoxean. Jolasen eta ariketen bidez haurrak bertsotan murgiltzea da helburua. Horretarako, bi bertsolari batuko zaizkie haurrei: Ainara Ieregi eta Iker Gorosterrazu.