Astelehenean hasi eta irailaren 14ra arte, mundu zabaleko hogei dokumentalgile bilduko dira Nafarroako Doklab egitasmoaren laugarren aldian. Doklab bi asteko egonaldi bat da, Oltzako jauregian (Nafarroa) egin ohi da, eta helburua da parte hartzen duten zinemagile gazteen lanak «ahalik eta jende gehienarengana» heltzea. Besteak beste, Mexikoko, Argentinako, Kolonbiako eta Dominikar Errepublikako sortzaileak elkartuko dira.
Tartean, elkarrizketak izango dira nazioarteko online plataformetako ordezkariekin eta zinema ekoizleekin, eta hainbat dokumentalgilek hitzaldiak egingo dituzte. Ekitaldi horien bidez, antolatzaileek nahi dute dokumentalgile hasiberriak «haztea», eta, bide batez, tresnak edukitzea lan «eraginkorragoak» eta «sortzaileagoak» egiteko. Horrez gain, elkarren esperientzien berri izatea eta elkar inspiratzea ere nahi dute.
«Posible da dokumentalak sortuz bizitzea?». Galdera hori izango dute hizpide Chico Pereirak eta Victor Kossakovskyk, zinemagile hasiberriekin. Pereirak Opa Films ekoiztetxea sortu zuen, eta narrazio teknika jorratzen du haren lanetan; esaterako, Netflixeko My love, mi amor telesailean. Kossakovskyk, berriz, poesia du abiapuntu bere filmetan, eta lan horietako batzuk Berlinalen eta Veneziako zinemaldian izan dira.
Alan Berliner zinemagile independenteak, berriz, filmen muntaketaz hitz egingo du. Dokumental autobiografikoak eta ikus-entzunezko saiakerak uztartzeagatik egin da ezaguna Berliner, eta, besteak beste, haren lanak Sundancen eta Berlinalen izan dira, hala nola The Sweetest Sound eta Wide Awake. Zehazki, film baten hasierako ideiatik abiatu eta lana sortu bitarteko prozesuaren inguruan solastatuko da.
