Elena Odriozolak egin du Donostiako Musika Hamabostaldiaren kartela

MUSIKA. Atzo aurkeztu zuten aurtengo Donostiako Musika Hamabostaldia iragarriko duen kartela. Elena Odriozola ilustratzaile donostiarrak egin du, antolatzaileek eskatuta. Hemeretzi saguz osatutako orkestra barroko bat irudikatu du Odriozolak, kartelari «ukitu infantila» eman nahian. Antolatzaileen arabera, «goxoa, intimista, itxura samurrekoa» da ilustratzaileak egindako lana. Abuztuaren 4tik 31ra izango da aurtengo Musika Hamabostaldia.