68 urte zituela hil da Felipe Gutierrez, Felipe Lipe gisa ezaguna. Tequila taldearen sortzailea eta kidea izan zen. Bost lagun aritu ziren taldean: Ariel Rot (gitarra), Alejo Stivel (ahotsa), Julian Infante (gitarra), Manolo Iglesias (bateria) eta Felipe Lipe bera (baxua).
Rotek eman du heriotzaren berri, sare sozialetara igo duen argitalpen batean: «Oraintxe jakin dut Felipe Lipe, Tequilaren funtsezko kide eta sortzailea, hil egin dela. Concepcion auzoko [Madril] estudio batzuetan grabatzen ari naiz, eta han urteak eman genituen entseatzen eta bizimodua nolabait ateratzen. Felipe, Julian, Manolo, a zer tristura».
Taldea sei urtez aritu ziren, 1977tik 1983ra, eta urte haietan zehar lau disko argitaratu zituzten: Matrícula de honor (1978), Rock and Roll (1979), Viva Tequila (1980) eta Confidencial (1981). Salta edota Rock and Roll en la plaza del pueblo abestiei esker sona handia lortu zuten.
1976an sortu zuten Tequila, Alejo Stivel eta Ariel Rot argentinarrak Madrilera heldu zirenean beren herrialdeko estatu kolpetik ihesi. Gaur egun, haiek dira taldea osatzen zutenen artetik bizirik geratzen diren bakarrak, Iglesias eta Infante hiesaren ondorioz zendu baitziren, bata 1994an eta bestea 2000. urtean.
