Ane Zubeldia Magriña idazleak (Hondarribia, Gipuzkoa, 1994) irabazi du 2026ko Gazteen Poesiako Espainiako Miguel Hernandez saria. Kontra poema liburuagatik (Susa) egin dio aitortza hori Espainiako Kultura Ministerioak. Zubeldia Magriñak 30.000 euro jasoko ditu.
Epaimahaiak poetaren «ezohiko intentsitate plastikoa» goraipatu du, bai eta «arrazoiaren logika iraultzeko darabilen hizkuntza esperimentala» ere. Honako hau ere nabarmendu dute epaimahaikideek: «Zubeldia Magriñak heldutasun handia erakutsi du erritmo sinkopatuen, errepikapenen eta onomatopeien erabilera zailean, eta, horri esker, zentzu berriak sortu ditu gaur egungo minei eta konplexutasunei heltzeko». Poetak ura metafora gisa baliatzeko duen modua txalotu dute, besteak beste: «Haren bertsoetan, uraren irudiek isiltasuna ekartzen dute gogora, eta izaki kontzientearen abandonuaren metafora bihurtzen dira». Kontra hitzari buruz ere mintzatu dira: «Idazketaz harago, gaur egungo munduaren trinkotasunaren aurkako erresistentziaren motor poetiko gisa ageri da».
Lehen poema liburua du Ane Zubeldia Magriñak Kontra; 2025ean eman zuen argitara, Susa argitaletxearekin. Poesiaz gainera, landu du beste literatur generorik ere. 2024an, Igartza literatura beka irabazi zuen Datorren udan ez gara hemen biziko nobela idazteko; aurtengo apirilean eman du argitara.
