Donostiako 86. Musika Hamabostaldiak hilabete osoa hartu du, eta Donostian eta Euskal Herriko beste zenbait lekutan egin ditu emanaldiak. Hilabetea amaitzera doan moduan, jaialdiak ere agur esango du Leipzigeko (Alemania) orkestraren bi emanaldirekin. Gaur eta bihar izango dira bi emanaldiak Andris Nelsons zuzendariaren gidaritzapean. Nabarmentzekoa da gaurkoan Isabelle Fauste arituko dela biolinean bakarlari modura, eta biharkoan, berriz, berezitasun nagusia ahots taldea izango da: Julia Kleiter eta Chistian Gerhaher bakarlariak eta Donostiako Orfeoia arituko dira.
Leipzigeko Gewandhaus orkestra 1743an sortu zuten hamasei merkatarik eta herritarrek, eta hortik datorkio Gewandhausorchester izena: arropa dendaren orkestra. Munduko orkestra zibilik zaharrena da, eta, gaur egun, urtean 250 emanalditik gora egiten ditu. 2018tik Andris Nelsons du zuzendaria.
Nelsons tronpetista gisa hasi zen, baina gaztetik zuzendaritza ikasketekin uztartu zuen tronpetista ibilbidea. Zuzendaritzaren aldeko hautua egin zuen, eta gaur egun munduko bi orkestra hoberenetakoen zuzendaria da: Bostongo Orkestra Sinfonikoarena eta Leipzigekoarena.
Emanaldiei dagokienez, gaurkoaren berezitasuna da Antonin Dvoraken Biolinerako kontzertua interpretatzeko Isabelle Faustek ordezkatuko duela Hilary Hahn. Faust Leopold Mozart eta Paganini lehiaketa entzutetsuen irabazle izan zen, eta gaztetik aritu da munduko orkestra ospetsuenekin lanean. Biolin jolearen jakin-min artistikoak errepertorio oso zabala interpretatzera eraman du: biolinerako kontzertu sinfoniko handiak jotzeaz gain, musika garaikidearekin lotura estua du.
Gaur iluntzeko emanaldia Arvo Parten Cantus in memoriam Benjamin Britten piezarekin hasiko dute. Hori interpretatzeko soilik hariak eta kanpai bat erabiltzen dira. Dvoraken Biolinerako kontzertua joko dute, jarraian Jan Sibeliusen 2. Sinfonia-rekin amaitzeko. 1902an estreinatu zuten sinfonia hori, eta finlandiarrek nazioaren independentziarako bidearen sinbolotzat hartu zuten.
Biharko ikuskizunean ahotsak izango du garrantzia. Izan ere, ospe handiko bi bakarlari arituko dira Donostiako Orfeoiarekin batera: Julia Kleiter sopranoa eta Chistian Gerhaher baritonoa. Gerhaherek 2018ko Hamabostaldian parte hartu zuen orain hurrena. Donostiako koruaren kasuan, jaialdia amaitzeko kontzertuen ohiko protagonistetako bat bilakatu da; izan ere, 75 alditan baino gehiagotan hartu du parte.
Ahots talde horrek eta orkestrak Felix Mendelssohnen omenezko saio bat egingo dute. Mendelssohn Leipzigeko orkestraren zuzendaria izan zen XIX. mendean, eta haren 5. Sinfonia interpretatuko dute —Erreformaren sinfonia—.
Emanaldiaren bigarren zatian, Johannes Brahams musikagilearen lan bati helduko diote. Haren Alemaniar Requiema joko dute, Erromantizismoaren garaiko errepertorio sinfoniko-koralaren pieza enblematiko bat. Lan horrek giro intimo eta gogoetatsua lortzen ditu, hildakoen meza tradizionaletatik urrundu, eta heriotzarekiko ikuspegi humanista eta itxaropentsua transmititzen du.
