GRUFF RHYS
'Dim Probs'
Diskoetxea:Rock Action.
Super Furry Animals taldearekin bere burua ezagutzera eman ondoren, Gruff Rhys galestarrak radar handietatik kanpo mugitzen diren disko estimagarriak argitaratzen segitzen du. Dim Probs bederatzigarrena du, eta, bere beste zenbait lanetan bezala, galesez abestu du disko osoan. Betiere poparen bueltan mugituz, tempo ertaineko eta detailez josiriko pieza ederrak —Taro#1 + #2, Adar Gwyn, Chwyn Chwyldroadol— eta pasarte akustiko iradokitzaileak —Pan Ddaw’r Haul I Fore— uztartzen ditu, eta Afrikara garamatzaten haizeak ere erabiltzen ditu noiz edo noiz, hala nola Acw kantan. Radarrak harrapatu beharko lituzkeen disko horietako bat da, beraz, Rhysen azkena.
