'Hegalen indarraz aitzina'

Punk doinuekin hazi ez den gutxienetakoa izango naiz. Halere, nirea ez den etxera sartuko naiz. Estreinako diskoa atera zuenetik Irunberriko Altxatu taldeari so ibili naiz. Hasiberrien freskotasuna eta inozentzia beharrezkoa da, edozein dela estiloa. Hiruko oso gazteak, Hegalen indarraz aitzina hirugarren diskoa argitaratu du, batez beste 18 urte dituztenean! Ezohiko kasuek, ezohiko azpimarra merezi dute. Hastapenetako lau akordeak, hamaika bihurtu dituzte, eta punk rock soiletik urrutirago iritsi dira. Naturaltasun osoz bilatu dutena, aurkitu dute. Errugabe edo Ez dut nahi oihukatzetik, lasaiago hitz egiten dute Berriro edo Biharko bide pausatuetan. Kontraste eta ñabardurak gehiago landu dituzte hirugarren lanean, eta proposamena asko aberastu. Hori gutxi balitz, Nafarroako hiriburuak merezi duen kantua egin dute.