Hizkuntza eta mitologia lotuko ditu Euskararen Jatorriaren Biltzarrak

Roslyn M. Frank, Juan Inazio Hartsuaga, Felix Zubiaga eta Xabier Renteriak hartuko dute parte, hitzaldi banarekin, Lazkaon (Gipuzkoa) maiatzaren 25ean egingo den Euskararen Jatorriaren Biltzarraren zortzigarren ekitaldian, Mitologia: jatorria irakurtzeko zientzia izenburupean. «Hizkuntza-mitologia bikote gisa gutxitan landu da, eta biltzarrak hutsune hori bete nahi du», azaldu dute antolatzaileek.

Ataungo San Gregorio auzoko Joxemiel Barandiaran museora egindako bisita gidatua, Jorge Oteizari egindako omenaldi bat, Antonio Laguardiak idazkera iberiarraz emandako azalpenak, liburu aurkezpenak eta Iruña-Veleiari buruzko azken berrien zabalkundea ere sartu dituzte egitarauan.

Hainbat argitalpen berri

Biltzarrean aurkeztuko diren argitalpenen artean, honako hauek daude iragarrita, besteak beste: Fernando Bustillo, Roslyn M. Frank eta Alfontso Martinez Lizarduikoaren Antzinako euskal matematikaz zenbait burutazio (Gaiak); Tom Ziemke, Jordan Zlatev eta Roslyn M. Frankek koordinatutako Body, Language and Mind I. Embodiment (Mouton de Gruyter); Tom Ziemke, Jordan Zlatev eta Roslyn M. Frankek koordinatutako Body, Language and Mind II. Sotiocultural Situatedness (Mouton de Gruyter); eta Roslyn M. Franken En torno a un mito: el euskera y el indoeuropeo (Hordago).