Gasteizko Andra Mari Zuriaren jaiak hasi aurretik, Iñaki Palacios txistulariak kontzertu sinfonikoa emango du Gasteizko Foru plazan, Bizi den hotsa izenburupean; abuztuaren 3an izango da, 22:00etan. Kontzertu horretan hainbat gonbidatuk parte hartuko dute: Iñigo Etxezarretak, Mikel Urdangarinek, Karmele Jaiok, Alan Dohertyk eta Goiatz Duttok.
Palacios buru dela, hirurogei musikari baino gehiago igoko dira oholtza gainera; tartean, Et Incarnatus orkestrakoak eta Arabako Gazte Abesbatzakoak. Dantzariak ere ikuskizunaren parte izango dira: DAB dantza garaikideko konpainiak eta Amezti dantza taldeak parte hartuko dute.
Emanaldiak tradizioa eta garaikidetasuna uztartuko ditu: txistua izango da ardatza, eta elkarrizketan ariko da orkestrarekin, abesbatzarekin eta gonbidatuekin. 7.000 pertsona inguru espero dituzte kontzertuan. Zuzenekoa grabatu egingo dute, eta aurrerago disko bat kaleratzeko asmotan dira.
