'Jesus Jordanen' obra ikusgai jarri dute Oteiza museoan

Altzuzako (Nafarroa) Oteiza museoan ikusgai jarri dute Jesus Jordanen eskultura. 1933an egindako «pieza berezi bat» dela azaldu dute museoko arduradunek, Jorge Oteizaren lehen sorkuntza aldikoa, beraz. Pagola Hernandez familiaren bildumako artelana gordailuan jaso du zentroak, eta, hala, urtebetez Altzuzan ikusgai egongo da orain. Horrela, museoak gehitu duenez, «osatu egingo da artistak 1930eko lehen urteetan, Latinoamerikara abiatu aurretik eginiko obra multzoa».

Igeltsuzko hustura lana da, 77 x 25,5 x 22 cm-koa, Latinoamerikarako bidaiaren aurretiko sailekoa, 1933an Donostian eginiko Gipuzkoako Artista Berrien Bienalean erakutsitakoa, Oteizak berak eskulturako lehen saria irabazi zuen hartan. Obrak figurazio landua erakusten du, eta bat egiten du artistaren lehen interesarekin.

Museoak erantsi duenez, Jesus Jordanen obra «bat dator artistaren arte produkzioko lehen fasearekin, hura oso lotua baitzegoen giza irudiaren bitartez espresioa bilatzearekin». Hala, museoak uste du zentroan egoteak «funtsezko ekarpena» egiten diola «eskultura gutxi gorde diren sorkuntza aldi goiztiar haren gaineko ulerkuntzari».