Emil Karlsen
'NANNÁMII'.
Diskoetxea:
Norse Music.
Hauxe da kantari eta aktore samiaren —laponiarraren, haiei gustatzen ez zaien izenaren arabera— lehenengo lan luzea. Norvegian bizi den artista honek identitatearen inguruko lan bat ondu du, eta horretarako bere familiaren eta Suediaren, Norvegiaren, Finlandiaren eta Kolako penintsularen artean banatuta bizi den herriaren tradizioetatik abiatu da, batik bat yoik kantaera tradizionaletik. Baina guztiari ukitu gaurkotua eman dio, pop musikaren egituretara eta produkziora ekarriz. Ahotsak dira protagonista, jakina, eta janzkera gozoarekin bilduta agertzen zaizkigu gehienetan. Horrek erraztu egiten du entzunaldia, batzuetan melenga bihurtzearen mugatik hurbil. Baina gustura entzuteko moduko diskoa da; samieraz, jakina!
